გირჩი საპრეზიდენტო არჩევნებზე ზურაბ ჯაფარიძის შედეგებთან დაკავშირებით მოქალაქეებს ფსონის დადებას სთავაზობს

პოლიტიკა - 16:36, 27 Sep, 2018

2357

Edison Research-ის დღეს გამოქვეყნებულ კვლევას „გირჩი“ ეხმაურება და მოქალაქეებს ფსონის დადებას სთავაზობს:

რუსთავი 2-ის კვლევით „გირჩს“ და ჯაფარას აქვს რეიტინგი 2%!

საქართველოში სულ არის მითქმა-მოთქმა კვლევების სანდოობასთან დაკავშირებით, რადგან პარტიების მიერ შეკვეთილი კვლევების შედეგები არასოდეს ემთხვევა რეალურ შედეგებს. გირჩს აქამდე არ გვქონია საშუალება ზუსტად გაგვეზომა ჩვენი რეიტინგი და გულწრფელად გვეთქვა სიმართლე საზოგადოებისთვის. ვფიქრობთ, ეს არჩევნები ყველა კვლევაზე უკეთ დაგვანახებს სურათს და ამიტომ დიდი მნიშვნელობა აქვს მასში გირჩის ყველა მხარდამჭერის მონაწილეობას.

თუმცა ყველა იმ ადამიანის ან ორგანიზაციისთვის, მათ შორის, პირველ რიგში, კვლევის ავტორების და შემკვეთებისთვის, რომელთაც საკუთარი თვალით აქვთ ნანახი რეალობა, სჯერათ ამ კვლევის შედეგების უტყუარობის და წარმოაჩენენ მათ, როგორც ჭეშმარიტებასთან მიახლოებულს, გვაქვს ასეთი შეთავაზება:

მოდით, მოვაწყოთ მარტივი ტოტალიზატორი და დავდოთ ფსონი:

ჰანდიკაპს გაძლევთ,

თუ ჯაფარა იღებს 5%-ზე ნაკლებს, იგებთ თქვენ, რაც ნიშნავს, რომ დამატებით მიიღებთ დადებული თანხის 100%-ს.

ანუ გირჩის წაგებაზე კუში არის 2.0. თუ ჯაფარა 5%-ს ან კვლევაში ნაჩვენებზე მინიმუმ ორნახევარჯერ მეტს იღებს, დადებული თანხა ჩვენია.

თუ კვლევის გჯერათ, დადეთ!

თანხის დადება შეგიძლიათ ჩვენს ანგარიშზე: GE60TB7791136080100005 და დანიშნულებაში მიუთითეთ „ფსონი“.

მინიმალური ფსონი არის 1000 ლარი.

პატივისცემით, გირჩი“- ნათქვამია „გირჩის“ განცხადებაში.