რეკეტი სახელმწიფოს სახელით - ლონდონის სასამართლოს წინაშე ყოფილ და მოქმედ მაღალჩინოსნებს ახსნა-განმარტების მიცემა მოუწევთ

პოლიტიკა - 12:00, 26 Sep, 2018

1462

რეკეტი სახელმწიფოს სახელით - საქართველოს ხელისუფლების ყოფილ და მოქმედ მაღალჩინოსნებს ლონდონის სასამართლოში დაკითხვაზე იბარებენ. დანაშაულში თანამონაწილეობისა და კორუფციის ბრალდებით სარჩელი საქართველოს ხელისუფლების წინააღმდეგ „ომეგა ჯგუფმა“ შეიტანა.

ცნობილია, რომ „ომეგას“ ინტერესებს მსოფლიოში ცნობილი საადვოკატო ფირმა "ფილდფიშერი" დაიცავს.

„დანაშაულში თანამონაწილეობისა და კორუფციის ბრალდებით ლონდონში შემუშავდა სარჩელი საქართველოს მთავრობის ყოფილი და მოქმედი წევრების წინააღმდეგ. სარჩელები შემუშავდება გიორგი გახარიას, ლევან ყიფიანის, ნოდარ ხადურის, ანზორ ჩუბინიძის, დიმიტრი ქუმსიშვილის და ბიძინა ივანიშვილის წინააღმდეგ.

თუკი სასამართლო ამას დაადგენს, მაშინ უკვე ფაქტი იქნება, რომ ის, რაზეც შეტანილია სარჩელი, არის სიმართლე. ამას თავისთავად მოჰყვება სისხლის სამართლის პროცესი და ჩვენ ვიმსჯელებთ იმაზე, თუ სად უნდა მიმდინარეობდეს ეს პროცესი საქართველოში თუ ინგლისში“-აცხადებს ”ომეგა ჯგუფის” ადვოკატი, იურიდიული კომპანია ”ფილდფიშერის” იურისტი კოლინ გიბსონი.

როგორც ”ომეგა ჯგუფის” ადვოკატი ამბობს, არსებობს საკმარისი მტკიცებულებები იმისათვის, რომ სასამართლო პროცესები დაიწყოს.

„მე ვნახე გარკვეული მტკიცებულებები, რომელთაც წარვუდგენ ინგლისის სასამართლოს. დეტალებზე თქვენთან ვერ ვისაუბრებ, თუმცა ვიტყვი, რომ საკმარისი სამხილები გვაქვს საიმისოდ, რომ დავიწყოთ პროცესი, როგორც ინგლისში, ასევე საქართველოში.
ჩვენი სარჩელის ფარგლებში, ბრალდებებს წარვუდგენთ ინგლისის უმაღლეს სასამართლოს. ქართველ მაღალჩინოსნებს მიეცემათ საშუალება თავად წარადგინონ თავიანთი მოსაზრებები მოსამართლის წინაშე ამის შემდეგ მიიღება გადაწყვეტილება,“-ამბობს ”ომეგა ჯგუფის” ადვოკატი, იურიდიული კომპანია ”ფილდფიშერის” იურისტი კოლინ გიბსონი.