საქართველოს პარლამენტის თავმჯდომარემ ირაკლი კობახიძემ ყოფილი პრემიერ-მინისტრის გიორგი კვირიკაშვილის თანამდებობიდან გადაყენების საკითხზე ისაუბრა. კობახიძის განცხადებით კვირიკაშვილის გაშვების მიზეზი გახდა ის, რომ მან ვერ უზრუნველყო სწორი საკადრო პოლიტიკა და სიღარიბე ვერ შეამცირა. ამის შესახებ კობახიძემ „ტვ პირველის“ გადაცემა „რეაქციაში“ ისაუბრა:

"კვირიკაშვილი იმიტომ კი არ გავუშვით პრემიერობიდან, რომ სიღარიბე მეტი გვაქვს, იმიტომ გავუშვით, რომ ამ სიღარიბის შემცირება კიდევ უფრო მეტად შეიძლებოდა სწორი საკადრო პოლიტიკის პირობებში, ეს ვერ უზრუნველყო და ამიტომ გავუშვით. მაგრამ ამ ვითარებაშიც კი, "ნაცმოძრაობის" მმართველობასთან შედარებით სიღარიბე 7-8%-ით შევამცირეთ. ეს არის რეალობა. 2012 წელთან შედარებით ბიუჯეტში დაახლოებით 50%-იანი ზრდაა. ეს ნიშნავს, რომ საქართველოს მოქალაქეებს 2012 წელთან შედარებით საშუალო მაჩვენებლი აქვს 50%-ით გაზრდილი შემოსავლები, მარტო დაბეგრილი შემოსავლები. ეს არის რეალობა. მაგრამ თუ გამოიყვანთ იმ 800 000 ადამიანს, რომლებიც სიღარიბის ზღვარს ქვემოთ ცხოვრობენ, შეიქმნება ყალბი სურათი. იმას კი არ ვამბობ, რომ ინგა გრიგოლია ან სხვა ჟურნალისტი რამეს აყალბებს, მაგრამ როდესაც ხდება ფაქტების არასწორი მიმართულებით წარმოჩენა ბუნებრივია ყალბი სურათი იქმნება საზოგადოებაში", - განაცხადა ირაკლი კობახიძემ.