გრიგოლ ვაშაძის საარჩევნო შტაბის ხელმძღვანელი, გიორგი ვაშაძე პარლამენტის თავმჯდომარის მხრიდან ოპონენტების კრიტიკას და მათ მიმართ გამოთქმულ ბრალდებებს პასუხობს.

ვაშაძის შეფასებით, კობახიძის განცხადებები „არაადეკვატურია.“

„დღეს ჩვენ ვნახეთ ხმააკანკალებული, კორუფციაში ჩაფლული მთავრობის პარლამენტის თავმჯდომარის განცხადება. აბსოლუტურად არაადეკვატური შეფასება არსებულ მოვლენებთან დაკავშირებით...

სწორედ ამ დიდი გაერთიანების გეშინიათ თქვენ და სწორედ ამიტომაა, რომ ყველა კვლევა თქვენ გიჩვენებთ, რომ თქვენი დღეები დათვლილია და ამ არჩევნებს იგებ გაერთიანებული ოპოზიცია „ძალა ერთობაშია,“ ჩვენი კანდიდატი, გრიგოლ ვაშაძე და იმიტომაც არის, რომ ასეთ არაადეკვატურ განცხადებებს ვისმენთ,“ - განაცხადა ვაშაძემ.

ვაშაძე პარლამენტის თავმჯდომარის მიერ გაკეთებულ იმ განცხადებასაც გამოეხმაურა, სადაც ირაკლი კობახიძემ აღნიშნა, რომ სალომე ზურაბიშვილის მიმართ ოპონენტები „დეზინფორმაციას და პიროვნულ შეურაცხყოფას“ მიმართავენ.

„ საზოგადოების მხრიდან ზურაბიშვილის მიმართ ნეგატიური განწყობა არა დეზინფორმაციის, არამედ აგვისტოს ომთან დაკავშირებული განცხადებების გამოა გამოწვეული. სწორედ ამიტომ არის, რომ სალომე ზურაბიშვილის მიმართ არის ამხელა ნეგატიური განწყობა ხალხის მხრიდან,“ - განაცხადა ვაშაძემ.

ოპოზიცია მმართველ გუნდს არჩევნების გაყალბების მცდელობაში ადანაშაულებს.

„როგორ მოხდა რომ შოთა მალაშხიას მიერ წარდგენილ სიას უცებ, ერთ ღამეში 26 ფურცელი დაემატა და ამის დამადასტურებელი დოკუმენტაცია გვაქვს. დიახ, ამ ყველაფერს ვაჩვენებთ ჩვენ საერთაშორისო საზოგადოებას და შეაფასებენ, როგორ დანაშაულებრივად მოქმედებს თამარ ჟვანია თქვენი დახმარებით და როგორ დანაშაულებრივად მოქმედებს მთელი თქვენი სისტემა იმისთვის, რომ რამენაირად ჩირქი ცხოთ ჩვენს გაერთიანებას „ძალა ერთობაშია,“ მაგრამ ჩვენ ვართ ორიენტირებული საქართველოს მომავალზე,“ - განაცხადა ვაშაძემ.

პარლამენტის თავმჯდომარემ „ნაციონალური მოძრაობა“ პროვოკაციებსა და შავ პიარში დაადანაშაულა.