"ასეთი ზიზღი და სიძულვილის გრძნობა საქართველოს მოქალაქეს არ ქონია"- გრიგოლ ვაშაძე ხელვაჩაურის სოფლების მოსახლეობას შეხვდა

პოლიტიკა - 18:41, 22 Sep, 2018

3145

გაერთიანებული ოპოზიციის მოძრაობა „ძალა ერთობაშიას“ პრეზიდენტობის კანდიდატი გრიგოლ ვაშაძე აჭარის რეგიონში შეხვედრებს განაგრძობს.
დღეს ვაშაძე ხელვაჩაურის მუნიციპაილტეტის სოფლების სალიბაურისა და თხილნარის მოსახლეობას შეხვდა. გრიგოლ ვაშაძესთან ადგილობრივებმა ის პრობლემები წამოჭრეს, რომელიც სხვა რეგიონების მსგავსად აჭარის მოსახლეობასაც აწუხებს.
პრეზიდენტობის კანდიდატმა მოსახლეობასთან იმ გზებზე ისაუბრა, რომლითაც ის ამ პრობლემების მოგვარებას აპირებს. გრიგოლ ვაშაძის განცხადებით არჩევნების მისი გამარჯვების შემდეგ დაიწყება ადგილებზე დასაქმების პროგრამები, პენსია 400 ლარი, ხოლო მასწავლებლის ხელფასი 1000 ლარი გახდება. კრედიტები კი 2012 წელს არსებული დოლარის კურსით დაანგარიშდება. ვაშაძის თქმით, ის იქნება მოქალაქეების და მედიის უფლებების დაცვის გარანტი. პრეზიდენტობის კანდიდატმა ტელეკომპანია "იბერიის" საქმეზე და მაღალჩინოსნების მიერ ბიზნესის გადანაწილების თემაზეც ისაუბრა:

„შემიძლია ვილაპარაკო იმ გასაჭირზე რაც ამ სოფელშია, მაგრამ ის არ იქნება განხვავებული, რაც მთლიან საქართველოშია. იმ გაბრაზების ფონზეც კი, რისი მოწმეც ჩვენ ივლისიდან ვართ, ასეთი ზიზღი და სიძულვილის გრძნობა საქართველოს მოქალაქეს არ ქონია, მანამდე სანამ არ დაიწყო ეს მრავალსერიანი ტრაგედია, რომელსაც „იბერიის საქმე“ ჰქვია. ხალხი თავს გრძნობს აბსოლუტურად შეურაცხყოფილად, როდესაც ვიღაც კანონიერი ქურდებივით ლექსიკით და მანერებით, რომელიც ჯერ კიდევ შევარდნაძის დროიდან ძარცვავდა საქართველოს მოქალაქეს, სიგარეტის ბიზნესს ინაწილებენ იმისათვის, რომ მერე ეს შავი ფული ქართული ოცნების საარჩევნოდ დასაფინანსებელ „შავ სალაროში“ შეიტანონ.“- განაცხადა გრიგოლ ვაშაძემ.