საფრანგეთის სასამართლომ ფრანგი ნაციონალისტების ლიდერს მარინ ლე პენს ფსიქიატრიული ექსპერტიზა დაუნიშნა. ეს გადაწყვეტილება სასამართლომ ტვიტერზე 2015 წელს ლე პენის მიერ გამოქვეყნებული კადრების გამო მიიღო, რომელშიც ISIS-ის ტერორისტების მიერ ადამიანების სიკვდილით დასჯა იყო ასახული.

გამოქვეყნებული გადაწყვეტილების თანახმად, სასამართლოს სურს რომ ექსპერტიზამ დაადგინოს, აქვს თუ არა პოლიტიკოსს რაიმე ფსიქიკური დაავადება და თუ კი, მაშინ შეეძლო თუ არა ამ დაავადებას გავლენა მოეხდინა ტვიტის გამოქვეყნების დროს მისი ქმედების გაცნობიერებაზე.

ექსპერტიზამ ასევე უნდა დაადგინოს, შეიცავს თუ არა მისი ფსიქიკური მდგომარეობა საზოგადოებისთვის საფრთხეს.

ლე პენი სასამართლოს გადაწყვეტილებას უგნურობას უწიდებს.

„ეს რეჟიმი ნამდვილად დაშინებას იწყებს“- დაწერა მან ტვიტერზე.

‘მე ვფიქრობდი, რომ მაქვს ყველაფრის უფლება, მაგრამ არა! ISIS- მიერ ჩადენილი საშინელებების დაგმობისთვის მე მინიშნავენ ფსიქიატრიულ ექსპერტიზას. რამდენად შორს წავლენ?!“- დაწერა ლე პენმა.

მოგვიანებით მან ჟურნალისტებს შეატყობინა, რომ ექსპერტიზის გავლას არ აპირებს:

„მინდა ვნახო, როგორ მაიძულებს ამას მოსამართლე“- აღნიშნა ლე პენმა.

შეგახსენებთ, საქმე ეხება 2015 წლის დეკემბერში სოციალურ ქსელში გავრცელებულ 3 ვიდეოს, რომელიც ლე პენმა თავის ტვიტერზე გამოაქვეყნა. პირველზე ასახულია ამერიკელი ჟურნალისტის ჯეიმს ფოულის სიკვდილით დასჯა, მეორეში ჩანს როგორ უვლის ტანკი ნარინჯისფერ კომბინეზონში ჩაცმულ ადამიანს, მესამეში კი ასახულია იორდანიელი მფრინავის მუარ ალ კასაბეჰის ცოცხლად დაწვა.

ლე პენს ბრალი ედება ძალადობის შემცველი კადრების გავრცელებაში, რომელიც შესაძლოა ხელმისაწვდომი გახდეს არასრულწლოვნებისთვის. ფრანგული კანონების მიხედვით, ასეთი კადრების გავრცელების გამო შესაძლოა ადამიანს 3 წლიანი პატიმრობა ან 75 ათასი ევროს ჯარიმა დაეკისროს.