ოპოზიცია პარლამენტის თბილისში გადმოტანას მწვავედ აკრიტიკებს

პოლიტიკა - 12:35, 21 Sep, 2018

826

საქართველოს პარლამენტი პლენარული სხდომების ფორმატში საქმიანობას მომავალი წლის იანვრიდან დედაქალაქში გააგრძელებს. შესაბამისი ცვლილება რეგლამენტში შედის. რაც შეეხება ქუთაისში არსებულ პარლამენტის შენობას ის შინაგან საქმეთა სამინისტროს გადაეცემა.

ფაქტს ოპოზიციის მწყავე კრიტიკა მოჰყვა. ფრაქცია „ნაციონალური მოძრაობის“ თავმჯდომარის მოადგილე სალომე სამადაშვილი აღნიშნავს, რომ პარლამენტის თბილისში გადატანით ქუთაისელები დამატებით ფინანსურ შემოსავალს დაკარგავენ.

„ეს პროცესი „ქართულმა ოცნებამ“ შეაჩერა ჯერ კიდევ 2012 წელს და შესაბამისად, ჩვენ ვხედავთ, რომ ვერანაირი დეცენტრალიზაცია ვერ ხდება, ქუთაისში როგორ ცხოვრობს ხალხი თქვენ თვითონ ჩამოდიხართ და ხედავთ, ვერანაირი სამუშაო ადგილები ვერ იქმნება. რა თქმა უნდა, ის, რომ ჩვენ აქ აღარ ჩამოვალთ უკვე ორ კვირაში ერთხელაც კი, როდესაც დღეს ორ კვირაში ერთხელ მაინც ჩამოდის პარლამენტი ქუთაისში, შესაბამის ზეგავლენას მოახდენს იმ ხალხზე, ვინც არის დაკავშირებული ამ პარლამენტის საქმიანობასთან,“ - განაცხადა სალომე სამადაშვილმა.

პარლამენტის ფრაქცია „ევროპული საქართველო - მოძრაობა თავისუფლებისთვის“ წევრი, ხათუნა გოგორიშვილი კი აღნიშნავს, რომ ქუთაისში პარლამენტის არსებობა მოსახლეობისთვის შემოსავლის ერთ-ერთ ძირითად წყაროს წარმოადგენს.

„ეს ნიშნავს, რომ ქუთაისს, გარდა საპარლამენტო დედაქალაქის სტატუსი აღარ ექნება, აქ ასევე, გამომდინარე იქიდან, რომ პარლამენტის წევრები აღარ ჩამოვლენ, გამომდინარე იქიდან, რომ პარლამენტის აპარატის ასეულობით თანამშრომელი აღარ ჩამოვა, ეს არის დამატებითი სამუშაო ადგილების და შემოსავლის მოკლება ქუთაისელებისთვის და არანაირად საქართველოს ურბანულ განვითარებას ხელს არ შეუწყობს,“ - განაცხადა გოგორიშვილმა.