მოძრაობა „ძალა ერთობაშიას“ საპრეზიდენტო კანდიდატი გრიგოლ ვაშაძე და მისი საარჩევნო შტაბი კანაფის კულტივაცია/ექსპორტის აკრძალვის შესახებ კონსტიტუციაში ცვლილებების შეტანის მიზნით ხელმოწერების შეგროვებას იწყებს. გაერთიანებული ოპოზიციის ლიდერები დარწმუნებულები არიან, რომ კანონით გათვალისწინებული 200 ათასი ხელმოწერის შეგროვებას ისინი უახლოეს დღეებში შეძლებენ.

„ძალა ერთობაშია“ ითხოვს, რომ კანონპროექტი პარლამენტში საერთოდ არ დარეგისტრირდეს და აიკრძალოს კანაფისა და ნარკოტიკების წარმოებისთვის საჭირო სხვა მცენარეების სასოფლო-სამეურნეო კულტურად გამოცხადება.

„არ გაგვიჭირდება, რა თქმა უნდა, 200 ათასი ხელმოწერის შეგროვება რადგან ეს არის საქართველოს მოსახლეობის პოზიცია, რომ ეს ქვეყანა არ უნდა იქცეს მარიხუანას კულტივატორ და ექსპორტიორ ქვეყანად ამაზეა და მოკიდებული ჩვენი ქვეყნისა და ჩვენი შვილების მომავალი. დღეს, როდესაც პარლამენტის თავმჯდომარე გვეუბნება, რომ დროებით შეჩერებულია ამ კანონპროექტის განხილვა და კონსულტაციების რეჟიმში გადადის, ეს არის უბრალოდ დროის გაწელვის მცდელობა.“- განაცხადა ზაალ უდუმაშვილმა.