მე ამაყად არამოდური ვიქნები, იმიტომ, რომ ვიყავი, ვარ და ყოველთვის ვიქნები ნარკოტიკებთან ბრძოლის მომხრე

მე ამაყად არამოდური ვიქნები, იმიტომ, რომ ვიყავი, ვარ და ყოველთვის ვიქნები ნარკოტიკებთან ბრძოლის მომხრე - გრიგოლ ვაშაძე

პოლიტიკა - 17:00, 20 Sep, 2018

1039

გაერთიანებული ოპოზიცია „ძალა ერთობაშიას“ საპრეზიდენტო კანდიდატი, გრიგოლ ვაშაძე „ევროპული საქართველოს“ ერთ-ერთი ლიდერის, გიგა ბოკერიას დღეს გაკეთებულ განცხადებას ეხმაურება, სადაც ბოკერიამ ვაშაძის ინიციატივა პოლიტიკურ პოპულიზმად მოიხსენია, რომელიც ბოკერიას შეფასებით, ირმა ინაშვილის გზავნილებს ემთხვევა.

ვაშაძე ამბობს, რომ მისი ინიციატივის მთავარი მიზანი, მომავალი თაობის დაცვაა.

„თუ საქართველოს მომავალის, ქართული ახალგაზრდობის ფიზიკური დაცვის, ქართველი ხალხის დაცვის გაწყვეტისგან, ეს არის იაფფასიანი პოპულიზმი და მოდური არ არის ზოგიერთ პოლიტიკურ სექტებში, მე ამაყად არამოდური ვიქნები, იმიტომ, რომ ვიყავი, ვარ და ყოველთვის ვიქნები ნარკოტიკებთან ბრძოლის მომხრე და მეორეც ერთი, მიხეილ სააკაშვილის და საერთოდ „ნაციონალური მოძრაობის“ ხელისუფლებამ ქვეყანაში შემოიტანა სიტყვის თავისუფლება და ჩვენ ცენზორები არ გვჭირდება. განსაკუთრებით ცენზორები არ გვჭირდება იმ პოლიტიკური დაჯგუფებისგან, რომელსაც თავისი საპრეზიდენტო კანდიდატი ჰყავს და კარგი იქნება, ეს საპრეზიდენტო კანდიდატი გააკონტროლონ, მას ელაპარაკონ და ჭკუა დაარიგონ,“ - განაცხადა გრიგოლ ვაშაძემ.