„მომავალმა პრეზიდენტმა მეუფეებს კი არ უნდა უკითხოს სახარება, არამედ პოლიტიკური თამაშებისგან უნდა გაათავისუფლოს ეკლესია“

„მომავალმა პრეზიდენტმა მეუფეებს კი არ უნდა უკითხოს სახარება, არამედ პოლიტიკური თამაშებისგან უნდა გაათავისუფლოს ეკლესია“ - დავით უსუფაშვილი

პოლიტიკა - 14:30, 19 Sep, 2018

755

სახელმწიფოსა და ეკლესიას შორის ურთიერთობა უკიდურესად არაჯანსაღია... მაგრამ ამგვარ ვითარებაზე პოლიტიკურად პასუხისმგებელი სახელმწიფოა - ასე ეხმაურება პრეზიდეენტობის კანდიდატი დავით უსუფაშვილი „ქართული ოცნების“ მიერ მხარდაჭერილ საპრეზიდენტო კანდიდატის, სალომე ზურაბიშვილის განცხადებებს, რომელიც მან ეკლესიასთან და სასულიერო პირებთან დაკავშირებით გააკეთა.

„სალომე ზურაბიშვილი, პრეზიდენტად არჩევის შემთხვევაში, აპირებს ეკლესიას, მეუფეებს და სხვა საულიერო პირებს ასწავლოს ჭკუა და კონსტიტუცია.

მე, პრეზიდენტად არჩევის შემთხვევაში, ვაპირებ უხერხემლო და ფარისეველ თანამდებობის პირებს, რომლებიც პატრიარქთან კეკლუცობით პიარს იკეთებენ და მის კალთას ამოფარებულები პასუხისმგებლობას გაურბიან, განვუმარტო კონსტიტუციური წესრიგის და სახელმწიფოებრივი ცხოვრების ანა-ბანა.

მარიხუანას მოშენების თაობაზე მმართველი გუნდის უპრეცედენტო იდიოტიზმმა, რომლის საზოგადოებისთვის ახსნა-განმარტება მათმა კანდიდატმა თავად იკისრა, სრულიად ერი და ბერი გადარია. ხოლო კონსტიტუციაც, კონკორდატიც, სახელმწიფოც და ეკლესიაც ქალბატონი სალომეს ოცნებელმა თანაგუნდელებმა დააზიანეს, როდესაც ერთ დღეში ლომებიდან კურდღლებად ქცეულები საპატრიარქოს იატაკზე იტყავებდნენ მუხლებს და პირობას დებდნენ, რომ მარიხუანას კულტივირების შერჩეული მოდელი „სათნო იქნება ღვთისათვის“...

ფაქტია, რომ სახელმწიფოსა და ეკლესიას შორის ურთიერთობა უკიდურესად არაჯანსაღია და ორივე ინსტიტუტს სერიოზული საფრთხით ემუქრება. მაგრამ ამგვარ ვითარებაზე პოლიტიკურად პასუხისმგებელი სახელმწიფოა. არაკვალიფიციური, უპასუხისმგებლო და ფარისეველი სახელმწიფო თანამდებობის პირების სინდისზეა დღეს ეკლესიაში და ეკლესიასა და სახელმწიფოს შორის არსებული პრობლემების უდიდესი უმრავლესობა. პოლიტიკოსებმა და სახელმწიფო თანამდებობის პირებმა უნდა შევწყვიტოთ საეკლესიო წრეების იმაზე წახალისება, რაც მერე აღარ მოგვწონს ხოლმე და ეკლესია როგორმე თავად მიხედავს საკუთარ პრობლემებს. ამიტომ, მომავალმა პრეზიდენტმა მეუფეებს კი არ უნდა უკითხოს საჯაროდ კონსტიტუცია და სახარება, არამედ პოლიტიკური თამაშებისგან უნდა გაათავისუფლოს ეკლესია და კანონი უნდა აქციოს სახელმწიფოში უზენაეს ძალად“ - აცხადებს უსუფაშვილი.