„თამარ ჟვანია სუს-ის დავალებას ასრულებს“ - გაერთიანებული ოპოზიცია ცესკო-ს პერსონალური მონაცემების გავრცელებაში ადანაშაულებს

პოლიტიკა - 15:10, 18 Sep, 2018

1295

გაერთიანებული ოპოზიცია - "ძალა ერთობაშია" ცენტრალურ საარჩევნო კომისიას კანონდარღვევაში ადანაშაულებს. საქმე ეხება ცესკოს-ს მიერ პერსონალური მონაცემების გადაცემას ერთ-ერთი მედიასაშუალებისთვის.

ამასთან დაკავშირებით საგანგებო ბრიფინგი გრიგოლ ვაშაძის შტაბის ხელმძღვანელმა გიორგი ვაშაძემ გააკეთა.

"ჩვენთვის ცნობილი გახდა კიდევ ერთი პროვოკაციის შესახებ, რომელიც სუს-მა ცენტრალურ საარჩევნო კომისიასთან ერთად დაგეგმა ჩვენი გაერთიანების წინააღმდეგ. საქმე ეხება მხარდამჭერების ხელმოწერებს, სადაც თითქოსდა პრემიერ-მინისტრი ბახტაძე არის ჩვენი კანდიდატის მხარდამჭერების სიაში. მე მინდა ერთი რამ განვაცხადო: საველე პირობებში, როდესაც გროვდება ეს ხელმოწერები, მსგავს პროვოკაციებს შეიძლება ჰქონდეს ადგილი. თუმცა ჩვენ არ ვიცით ნამდვილად არის თუ არა ეს ასე.

ჩვენთვის ცნობილი გახდა, როცა ტვ "იმედის" ჟურნალისტმა მაჩვენა ასლი ორიგინალის, რომელიც წესით უნდა ინახებოდეს დალუქულ მდგომარეობაში მხოლოდ ცენტრალურ საარჩევნო კომისიაში. ცესკოს მხრიდან პერსონალური ინფორმაციის გავრცელება დანაშაულია. კიდევ ერთხელ მოვუწოდებ სუს-ს, ცენტრალურ საარჩევნო კომისიას - დაიცავით კანონი, ნუ არღვევთ კანონს. არავის აქვს უფლება, შეგროვებული ხელმოწერების გადაცემის და გავრცელების სხვა მხარისთვის. მით უმეტეს იქნება ეს ჟურნალისტი თუ სხვა ადამიანები. ხელმოწერები, რომელიც გროვდება ილუქება ცესკოში, იხსნება გადამოწმების დროს და შემდეგ ისევ ილუქება. ერთადერთი წყარო, სადაც დევს ეს ხელმოწერები ეს არის ცესკო. ეს ყველაფერი კიდევ ერთხელ მიუთითებს, რომ ქალბატონი ჟვანია ასრულებს სუს-ის დავალებებს და მოქმედებს "ქართული ოცნების" შტაბის დავალებებით, რომ ჩვენი მძლავრი გაერთიანების დისკრედიტაცია მოხდეს. ბოლომდე მივიყვანთ ყველა საქმეს, ყველა ამ თემას გამოვიძიებთ და ამ საქმეებთან დაკავშირებით მოგაწოდებთ ინფორმაციას" - განაცხადა გიორგი ვაშაძემ.