საქართველოს პარლამენტის თავმჯდომარე ირაკლი კობახიძე კათოლიკოს-პატრიარქს ილია მეორეს საპატრიარქოში შეხვდა. საუბრის მთავარი თემა კანაფის კულტივაცია-ექსპორტის საკითხი იყო.

უმაღლესი საკანონმდებლო ორგანოს თავმჯდომარის განცხადებით, ამ თემაზე კონსულტაციები როგორც საპატრიარქოსთან, ასევე, საზოგადოებასთან გაგრძელდება იმ დრომდე, სანამ მოქალაქეებს კანონპროექტთან დაკავშირებით სრულყოფილი ინფორმაცია არ ექნებათ.

„მქონდა გუშინ შეხვედრა პატრიარქთან, საპატრიარქოს წარმომადგენლებთან. გვქონდა ძალიან კარგი საუბარი ამ საკითხთან დაკავშირებით. პატრიარქი არის არა მხოლოდ ჩვენი სულიერი ლიდერი და ეკლესიის ხელმღვანელი, არამედ ის არის ბრძენი ადამიანი და მას აქვს ყოველთვის სწორი პოზიცია იმ საკითხებთან დაკავშირებით, რომელიც ეხება ზოგადად ჩვენს ქვეყანაში მიმდინარე პროცესებს. აქედან გამომდინარე ჩვენ აუცილებლად მოვუსმენთ როგორც საზოგადოებას ისე ეკლესიას. შეჩერებულია კანონპროექტის განხილვა და დავიწყებთ ძალიან აქტიურ კონსულტაციებს ყველასთან იმისთვის, რომ გავაცნოთ საზოგადოებას კანონპროექტის შინაარსი,“-განაცხადა ირაკლი კობახიძემ.