"ნარკოტიკები ძალიან საშიშია... ხელისუფლება პასუხისმგებელია და ამიტომ მათზეა დაკისრებული ეს პასუხისმგებლობა"

"ნარკოტიკები ძალიან საშიშია... ხელისუფლება პასუხისმგებელია და ამიტომ მათზეა დაკისრებული ეს პასუხისმგებლობა" - პატრიარქი მარიხუანას კულტივაციაზე

პოლიტიკა - 14:06, 16 Sep, 2018

2253

კანაფის კულტივაციისა და ექსპორტის ლეგალიზებასთან დაკავშირებით მთავრობის ინიციატივას გამოეხმაურა სრულიად საქართველოს კათალიკოს-პატრიარქი დღეს, სამების საკათედრო ტაძარში ტრადიციული საკვირაო ლოცვის დასრულების შემდეგ.

„ნარკოტიკები ძალიან საშიშია… ხელისუფლება პასუხისმგებელია და ამიტომ მათზე დაკისრებულია ეს პასუხისმგებლობა,”

პატრიარქმა აღნიშნა, რომ საზოგადოებაში არის მღელვარება ამ საკითხზე და ხელისუფლებას, რომელსაც არანაკლებად შესტკოივა გული ახალგაზრდებზე, უწმინდესის თქმით, სწორედ მას ეკისრება მთელი პასუხისმგელობა.

„ამ ბოლო დროს მღელვარება შემოვიდა ჩვენს ხალხში, რომ ნარკოტიკები, მარიხუანა, კანაფი და სხვა ნარკოტიკები შემოვა, იქნება მიღებული. არ უნდა შეგვეშინდეს, არ უნდა ვიფიქროთ იმის შესახებ, რომ ღმერთმა მიგვატოვა ჩვენ. ჩვენ არ უნდა ვიფიქროთ ისეც, რომ ჩვენ შეგვტკივა გული ჩვენი სამშობლოსათვის, ჩვენი ხალხისათვის, ჩვენი ახალგაზრდობისათვის და სხვას კი არ შესტკივა. მე მინდა ვთქვა, რომ არანაკლებად შესტკივა გული სამშობლოსათვის ჩვენს ხელისუფლებას. ხელისუფლება პასუხისმგებელია და ამიტომ მათზე დაკისრებულია ეს პასუხისმგებლობა. მე მინდა ვთქვა, რომ ეს ნარკოტიკები ძალიან საშიშია. ჩემი აზრით, მთავრობამ უნდა აიღოს პასუხისმგებლობა და გააკონტროლოს მდგომარეობა. კერძო სექტორში არ უნდა გადავიდეს ეს დარგი. კერძო სექტორში რომ გადავიდეს, ჩვენ ვერ გავაკონტროლებთ მას. ახლა დგას საკითხი, რომ კანონმდებლობა იყოს გამომუშავებული. იმ კანონმდებლობაში უნდა იყოს ნათქვამი, რომ მთავრობა პასუხს აგებს ამ პროცესზე,“ - განაცხადა ილია მეორემ.