"გადახედვას არ ექვემდებარება ის ფაქტი, რომ ომი რუსეთმა დაიწყო" - პრეზიდენტის საპარლამენტო მდივანი ზურაბიშვილის განცხადებაზე

პოლიტიკა - 12:29, 15 Sep, 2018

1223

პრეზიდენტის საპარლამენტო მდივანი ანა ნაცვლიშვილი 2008 წლის ომთანდაკავშირებით პრეზიდენტობის დამოუკიდებელი კანდიდატის სალომე ზურაბივილის განცხადებებას ეხმაურება.

მისი თქმით, “გადახედვას არ ექვემდებარება ის ფაქტი, რომ რუსეთ-საქართველოს ომი რუსეთმა დაიწყო“.

„საქართველო არის ოკუპურებული ქვეყანა და გადახედვას არ ექვემდებარება ის ფაქტი, რომელიც აღიარებულია - რუსეთ-საქართველოს ომი რუსეთმა დაიწყო. ისევე, როგორც საუკუნეების განმავლობაში, ისტორიულად რუსეთი ებრძოდა საქართველოს სახელმწიფოებრიობასა და ტერიტორიულ მთლიანობას. აქედან გამომდინარე, საქართველოს პრეზიდენტის ყველაზე მნიშვნელოვანი თუ არა, ერთ-ერთი უმთავრესი ფუნქციაა საქართველოს ადვოკატირება განსაკუთრებით საერთაშორისო ასპარეზზე, რათა მსოფლიოს დღის წესრიგში მუდმივად იდგეს ოკუპაციისა და რუსეთის, როგორც ოკუპანტის თემა. ვინც არ უნდა დაიკავოს ეს პოზიცია, მისი უმთავრესი ფუნქცია იქნება სწორედ ქვეყნის საერთაშორისო ასპარეზზე წარმოჩენა, როგორც ოკუპირებული ქვეყნის და რუსეთის მხილება ყველა საშუალებით იმ დანაშაულებში, რომელიც ჩაიდინა და დღემდე ჩადის საქართველოსთან მიმართებაში", - განაცხადა ნაცვლიშვილმა.

ზურაბიშვილმა აგვისტოს ომთან დაკავშირებით დასმულ კითხვაზე განაცხადა, რომ „ჩვენ დავბომბეთ ჩვენი მოსახლეობა, რისი უფლებაც არც ერთ პრეზიდენტს არ გააჩნია“.