ახალი სკანდალური ჩანაწერი "იბერიას" საქმეში - პროკურატურა ლევან ყიფიანს და ზაზა ოქუაშვილს გამოკითხავს

პოლიტიკა - 13:58, 14 Sep, 2018

1301

საქართველოს მთაგვარი პროკურატურა "იბერიას" სამეზე დღეს გავრცელებულ სკანდალურ ჩანაწერზე ლევან ყიფიანისა და ზაზა ოქუაშვილს გამოკითხავს.

"დღევანდელი ჩანაწერით, რა თქმა უნდა, დაინტერესდება გამოძიება და ერთიან კონტექსტში განიხილება;

მედიასაშუალებებში დღემდე გასული აუდიოჩანაწერები გამოთხოვილია ტელევიზიებიდან, ზაზა ოქუაშვილი და ლევან ყიფიანი კი, რომლებიც სავარაუდოდ, ჩანაწერში ფიგურირებენ, დაკითხვაზე არიან გამოძახებული;

ლევან ყიფიანი, რომელიც თბილისში არ იმყოფება, 17 სექტემბერს გამოცხადდება დაკითხვაზე;

ასევე, თბილისში დაბრუნების შემდეგ გამოძიებასთან თანამშრომლობის მზადყოფნას გამოთქვამს ზაზა ოქუაშვილი"- განუცხადეს "ნიუპოსტს" პროკურატურაში.

"იბერიას“ საქმეზე „კურიერმა“ კიდევ ერთი ფარული ჩანაწერი მოიპოვა, სადაც ტელეკომპანიის მფლობელებს პრობლემების მოგვარებისთვის სთავაზობენ, რომ ბიძინა ივანიშვილის გარემოცვას სამი მილიონი მისცენ.

ჩანაწერში, სადაც კინიგზის სამეთვალყურეო საბჭოს წევრი, ლევან ყიფიანი და „ომეგა ჯგუფის“ მფლობელი ზაზა ოქუაშვილი საუბრობენ, სახელმწიფო დაცვის სპეციალური სამსახურის უფროსის, ანზორ ჩუბინიძის და ფინანსთა ყოფილი მინისტრის, დიმიტრი ქუმსიშვილის გვარები ისმის.

ლევან ყიფიანი ბიძინა ივანიშვილის დაცვის ყოფილ უფროსსა და ამჟამად სახელმწიფო დაცვის სპეციალური სამსახურის ხელმძღვანელს ანზორ ჩუბინიძეს ახსენებს, როგორც მათ გულშემატკივარს. ასევე ყოფილ ვიცე-პრემიერს დიმიტრი ქუმსიშვილს.

აუდიოჩანაწერში ყიფიანი და ოქუაშვილი საუბრობენ სამ მილიონზე, რომლიდანაც ნაწილი ბიუჯეტში უნდა შეიტანონ, ნაწილი კი კონტრიბუციის სახით უნდა გადაიხადოს „ომეგა ჯგუფმა“.