ლაშა გოგიას ირაკლი კობახიძე მფარველობდა - ამ განცხადება აკეთებს „თავისუფალი საქართველოს“ პრეზიდენტობის კანდიდატი - კახა კუკავა, რომელიც ზუგდიდის მერის, ლაშა გოგიას გადადგომას და მის წინააღმდეგ სისხლის სამართლის წესით გამოძიების დაწყებას გამოეხმაურა.

„მმართველი პარტიის ლიდერები „ნიანგის ცრემლებს“ ღვრიან, თითქოს დღეს აღმოაჩინეს ლაშა გოგიას კორუმპირებულობა, მაშინ როცა მთელმა ზუგდიდმა იცის, რომ ლაშა გოგიამ, ყოფილმა გუბერნატორმა შონიამ და მხედრიონის ყოფილმა ლიდერებმა - ზუგდიდი პალერმოდ გადააქციეს ბოლო წლების განმავლობაში" - აცხადებს კუკავა.

მისი თქმით, „თავისუფალი საქართველოს“ ზუგდიდის კომიტეტი წლების მანძილზე ითხოვდა ადგილობრივი ხელისუფლების კორუფციული საქმიანობით საგამოძიებო ორგანოების დაინტერესებას. კუკავა ამბობს, რომ 2017 წლის საარჩევნო კამპანიისას გოგიას დანიშვნას "მფარველობას პარლამენტის თავმჯდომარე - ირაკლი კობახიძე უწევდა".

"დაუჯერებელია ისიც, რომ მრავალმილიონი კორუფციიდან, რომელსაც კურირებდა გოგია, ზუგდიდიდან წილი არ იგზავნებოდა თბილისში.

გამოძიება უნდა წარიმართოს არა მხოლოდ ლაშა გოგიას ეპიზოდზე, არამედ იმ კორუფციული ჯაჭვის შესახებ, რომელიც იწყება ზუგდიდში და მთავრდება თბილისში, „ქართული ოცნების“ ცენტრალურ ოფისში“ - განაცხადა კახა კუკავამ.