მძიმედ მოწამლული Pussy Riot-ის წევრი საავადმყოფოში გადაიყვანეს - ვარაუდობენ, რომ ვერზილოვი განზრახ მოწამლეს

მსოფლიო - 16:28, 13 Sep, 2018

3384

გამოცემა „მედიაზონის“ დამფუძნებელი და ჯგუფ Pussy Riot-ის წევრი პიოტრ ვერზილოვი 12 სექტემბერს მძიმე მდგომარეობაში მყოფი რეანიმაციულ განყოფილებაში მოხვდა. სავარაუდო მიზეზად მედიკამენტებით მოწამვლა სახელდება. ოჯახის წევრები უარყოფენ იმ ფაქტს, რომ მედიკამენტები შესაძლოა თავად პიოტრ ვერზილოვს მიეღოს.

ვერზილოვს ანალიზები ჩაუტარდა, თუმცა მათი შედეგები ჯერჯერობით ცნობილი არაა.

ოჯახის წევრების თქმით, ვერზილოვი ცუდად სასამართლო სხდომის შემდეგ ცოტა ხანში გახდა, სასამართლოზე მის წინააღმდეგ ადმინისტრაციული საქმე განიხილებოდა. ვერზილოვმა დაკარგა მეტყველების და მოძრაობის უნარი, ეთიშებოდა გონება, სასწრაფო დახმარების მანქანაში იგი უკვე ნახევრად მძინარე მდგომარეობაში იმყოფებოდა.

როგორც რუსული მედია წერს, ექიმებმა ვერზილოვს ვერტებრო-ბაზილარული უკმარისობის დიაგნოზი დაუსვეს.

ექიმების განცხადებით ვერზილოვი საავადმყოფოში მძიმე მდგომარეობაში შეიყვანეს, ამ დროისთვის მისი მდგომარეობა შედარებით გაუმჯობესდა, თუმცა ის კვლავ ხელოვნური ძილის მდგომარეობაში იმყოფება, მედიკოსები ვარაუდობენ, რომ მას მძიმე მდგომარეობიდან გამოსასვლელად 3-4 დღე დასჭირდება.

შეგახსნებთ, პიოტრ ვერზილოვი ერთ-ერთი მათგანი იყო, ვინც 16 ივლისს მსოფლიო ჩემპიონატის ფინალურ მატჩზე სტადიონზე შეიჭრა.ჯგუფის წევრებმა ამ გზით გააპროტესტეს რუსეთში პოლიტიკური პატიმრების არსებობა, მათ შორის, უკრაინელი რეჟისორის, ოლეგ სენცოვის უკანონო პატიმრობა, აქციების დროს ხალხის მასობრივი დაკავება და რუსეთის პოლიტიკური ცხოვრებიდან კონკურენციის გაქრობა. Pussy Riot-ის წევრები სტადოონზე პოლიციელების ფორმაში გამოწყობილები შეიჭრნენ, აქციას კი ერქვა „პოლიციელი თამაშში შედის“.

ამ მატჩს რუსეთის პრეზიდენტი ვლადიმერ პუტინი, ფრანგ და ხორვატ კოლეგებთან ერთად ესწრებოდა.