სალომე ზურაბიშვილის სკანდალური განცხადებები რუსეთ-საქართველოს აგვისტოს ომთან დაკავშირებით - აღნიშნულს არასამთავრობო ორგანიზაციები აპროტესტებენ.

ფონდ „ღია საზოგადოება საქართველოს“ წარმომადგენელი ჰააგაში, ნიკა ჯეირანაშვილი აცხადებს, რომ მას შემდეგ რაც სასამართლო გადაწყვეტილებას მიიღებს და განაჩენს გამოიტანს, მნიშვნელოვანი იქნება პოლიტიკური კონტექსტი და გადაწყვეტილებები.

„საგამოძიებო პროცესის შემდეგ ჰააგის სასამართლომ უნდა გამოსცეს კონკრეტულ პირებზე დაკავების ორდერები, რასაც შემდეგ უკვე სჭირდება პოლიტიკური მხარდაჭერა, რომ კონკრეტული ადამიანები იქნენ დაკავებულები და ჰააგის სასამართლოში მიყვანილები. სწორედ ამ პროცესისთვის ძალიან დამაზიანებელია ასეთი განცხადებები,“- აღნიშნა ნიკა ჯეირანაშვილმა.

მესამე სექტორში აცხადებენ, რომ მსგავსი განცხადებები რუსეთის წინააღმდეგ შეტანილ საქმეებზე საერთაშორისო სამართლის ორივე ინსტანციაში უკიდურესად უარყოფითად იმოქმედებს.

„ასეთი განცხადებები, განსაკუთრებით მას შემდეგ თუკი ის გახდება საქართველოს პრეზიდენტი, ბუნებრივია შესაძლებელია, აღმოჩნდეს მნიშვნელოვანი მტკიცებულება ჩვენი მტრის ხელში საერთაშორისო სასამართლოებში. ამის პრეცედენტებიც არსებობს, მაგალითად, 1974 წელს ავსტრალია-საფრანგეთის წინააღმდეგ საქმეზე, რომელშიც მტკიცებულებად იქნა მოხმობილი პოლიტიკოსების განცხადება, პრეზიდენტის განცხადება სასამართლოში, ასე, რომ თუკი ეს ადამიანი იქცევა საქართველოს პრეზიდენტად, მისი საჯარო განცხადებები მნიშვნელოვან გავლენას მოახდენს სახელმწიფოს მიერ საკუთარი ინტერესების დაცვაზე საერთაშორისო სასამართლოებში,“- განაცხადა ”საქართველოს დემოკრატიული ინიციატივას” თავმჯდომარემ, გიორგი მშვენიერაძემ.