რუსეთის პრეზიდენტის ვლადიმერ პუტინის განცხადებით დიდი ბრიტანეთის ქალაქ სოლსბერიში სკრიპალების მოწამვლის საქმეში ეჭვმიტანილი პირები რუსეთის ხელისუფლებისთვის ცნობილია და ისინი სამოქალაქო პირები არიან. ამის შესახებ პუტინმა აღმოსავლეთის ეკონომიკურ ფორუმზე ისაუბრა:

„ჩვენ რა თქმა უნდა გავარკვიეთ ვინ არიან ეს ადამიანები და ვიცით მათ შესახებ. ჩვენ ისინი ვიპოვეთ. გარწმუნებთ, არაფერი განსაკუთრებული და კრიმინალური არაა. ისინი სამოქალაქო პირები არიან“- განაცხადა პუტინმა.

პუტინი ვარაუდობს, რომ ეჭვმიტანილები აღნიშნულ მოვლენაზე საკუთარ ვერსიის შესახებ მედიასთან უახლოეს მომავალში ისაუბრებენ. პუტინმა თავის გამოსვლაში ეჭვმიტანილების სახელები არ დაუსახელებია.

სერგეი სკრიპალი და მისი შვილი იულია ნერვულ-პარალიტიკური ნივთიერება „ნოვიჩოკით“ სოლსბერიში 4 მარტს მოწამლეს, ამ ნივთიერების წარმოება ჯერ კიდევ საბჭოთა კავშირში ხდებოდა, ბრიტანეთის ხელისუფლების მონაცემებით, ქიმიური თავდასხმა რუსეთის სამხედრო დაზვერვის ორმა აგენტმა მოაწყო, რომლებიც ცნობილები არიან სახელებით ალაქსანდრ პეტროვი და რუსლან ბიშიროვი. ისინი დიდ ბრიტანეთში მარტის დასაწყისში 3 დღით ჩაფრინდნენ. ბრიტანეთის ხელისუფლების თქმით, მათი სახელები შესაძლოა ყალბი იყოს.

ლონდონი ირწმუნება, რომ თავდასხმა კრემლის ორგანიზებით მოხდა და პასუხისმგებლობას მომხდარზე პირადად პუტინს აკისრებს. მოსკოვი ბრალდებებს უარყოფს.

ტაბლოიდი Daily Express-ი იტყობინებოდა, რომ ბრიტანული დაზვერვა ეჭვმიტანილებზე იმ მასალების მეშვეობით გავიდა, რომელიც მათ „დავერბოვკებულმა“ რუსმა აგენტმა, (კოდური სახელი „აპოლონი“) მიაწოდა, რომელსაც პუტინის პოლიტიკის გამო ქვეყნიდან ემიგრირება სურდა.

გაზეთი The Mirror ადრე წერდა, რომ საქმეში გამოჩნდა კიდევ 4 უცნობი პირი - ჯგუფი სახელით „ჩისტილშიკები“, რომლებიც საჭირო იყვნენ „პეტროვისა“ და „ბოშიროვისთვის“ თვალყურის სადევნებლად და გაუთვალისწინებელ მოვლენების განვითარების შემთხვევაში საქმეში ისინი უნდა ჩართულიყვნენ.