რუსეთის გვარდიის მეთაური ალექსეი ნავალნის დუელში იწვევს და ფიზიკური ანგარიშსწორებით ემუქრება

მსოფლიო - 16:01, 11 Sep, 2018

2377

რუსეთის გვარდიის მეთაური ვიკტორ ზოლოტოვი ალექსეი ნავალნის დუელში იწვევს. მიზეზი კორუფციასთან ბრძოლის ფონდის მიერ გამოქვეყნებული პუბლიკაცია გახდა, რომელშიც საუბარი იყო უწყებისთვის შეძენილ პროდუქტებზე ფასის განგებ მომატებაზე. ზოლოტოვი ნავალნის ვიდეომიმართვაში დაემუქრა, რომელიც რუსეთის გვარდიის ვებგვერდზე გამოქვეყნდა.

„ჩემთან მიმართებაში თქვენ შეურაცხმყოფელი, ცილისმწამებლური მოსაზრებები გქონდათ. ოფიცერებში ასე უბრალოდ პატიება მიღებული არაა. საუკუნეების განმავლობაში ნაძირლებს სილას აწნავდნენ და დუელში იწვევდნენ. ბატონო ნავალნი, ჩვენ ხომ არავინ გვიშლის ამ ტრადიციების ნაწილობრივ დაბრუნებას. მე ვგულისხმობ სატისფაქციას. მე თქვენ დუელში გიწვევთ - რინგზე, ტატამზე, ნებისმიერ ადგილზე, სადაც გპირდებით რომ თქვენგან კარგ, წვნიან ხორცის ნაჭერს დავამზადებ.“- განაცხადა ზოლოტოვმა. ამასთანავე რუსეთის გვარდიის ხელმძღვანელი ალექსეი ნავალნის ამერიკის პროდუქტს და მარიონეტს უწოდებს.

„საერთოდ ვინ ხართ, ნავალნი, მინდა გავიგო თქვენი შემადგენლობა, საიდან გამოჩნდით და რისთვის? მესმის, რომ თქვენ ამერიკული პროდუქტი ხართ, ყველა კლონები და მარიონეტები. მესმის, რომ თქვენ ამოცანას წარმოადგენს, ყველა და ყველაფერი თქვენს გარშემო ტალახში მოსვაროთ, მოახდინოთ ქვეყნის პოლიტიკური და ეკონომიკური დესტაბილიზაცია.“- აცხადებს ზოლოტოვი.

შეგახსენებთ, 23 აგვისტოს ნავალნის კორუფციასთან ბრძიოლის ფონდმა გამოაქვეყნა გამოძიების შედეგები, რომელშიც ირწმუნებოდნენ, რომ რუსეთის გვარდიამ 2018 წელს პროდუქტები გაზრდილი ფასებით შეიძინა, ეს მოხდა სავარაუდოდ მას შემდეგ, რაც პრემიერ-მინისტრ დიმიტრი მედვედევის ბრძანებით, პროდუქციის შეძენა დაიწყეს ხორცკომბინატ „Дружба народов“ -სგან და არა სხვადასხვა მომწოდებლებისგან. აღნიშნული ხორცკომბინატის მფლობელი კი ხელისუფლებასთან დაახლოებული პირი ბორის კანტემიროვია, რომელიც ადრე შსს-ში მაღალ თანამდებობას იკავებდა. რუსეთის გვარდიის ხელმძღვანელობა ნავალნის ორგანიზაციის ბრალდებებს უსაფუძვლოს უწოდებს.

ზოლოტოვის განცხადებაში კრემლში მუქარას ვერ ხედავენ და აღნიშნულ განცხადებაზე რეაგირების მოხდენას არ აპირებენ.