ცენტრალურ საარჩევნო კომისიას არჩევნების გაყალბებაში კვლავ ადანაშაულებს გაერთიანებული ოპოზიცია „ძალა ერთობაშია“. ამის შესახებ დღეს გამართულ ბრიფინგზე საპრეზიდენტო კანდიდატის გრიგოლ ვაშაძის საარჩევნო შტაბის ხელმძღვანელმა გიორგი ვაშაძემ ისაუბრა:

„დღეს პირველ საათზე ყველა რაიონში დაგეგმილია საოლქო საარჩევნო კომისიების სხდომები, სადაც უნდა გადაწყვიტონ საუბნო-საარჩევნო კომისიების ფორმირების საკითხები, მე ხელთ მაქვს 22 ოლქიდან მოპოვებული ინფორმაცია, სახელები და გვარები იმ ადამიანების, რომელიც „ქართულმა ოცნებამ“ გადაწყვიტა, რომ უნდა დანიშნონ კომისიებში, ეგრეთ წოდებულ დამოუკიდებელ ნაწილში, ჯამურად ეს ციფრი არის 21 ათასი ადამიანი, რომელიც მათ უნდათ, რომ ჩართონ ამ გაყალბების მექანიზმში. ვინ არის ეს ხალხი? ეს ხალხი არის ცოლები და ქმრები, საკრებულოს წევრების, საოლქოს წევრების, „ქართული ოცნების“ ლიდერების ადგილობრივ დონეზე, ოჯახის წევრები, შორს არ გადიან და რაც ყველაზე სამწუხაროა, პირველად საქართველოში, შევარდნაძის დროსაც კი არ ყოფილა მსგავსი რამ, 12 კომისიის წევრიდან, მათ უნდათ, რომ 9 წევრი დანიშნონ სწორედ ქართული ოცნების შტაბიდან. ექვსი ვითომ პროფესიონალი და სამი ვითომ წარმომადგენელი მათი პოლიტიკური პარტიის. ამავე სიაში ჩვენ მითითებული გვაქვს, როგორ წინასწარ არის გადაწყვეტილი, ვინ უნდა იყოს თავმჯდომარე, ვინ უნდა იყოს მოადგილე, ვინ უნდა იყოს მდივანი, ეს არის უზარმაზარი გაყალბების მექანიზმი, რომელსაც თამარ ჟვანია ქმნის სწორედ „ართული ოცნების“ დავალებით. ის თამარ ჟვანია, რომელსაც კანონით შეუწყდა უფლებამოსილების ვადა, მაგრამ „ქართულმა ოცნებამ“ მას აჩუქა არჩევნების ჩატარების საბოლოო დრო. ჩვენ ყველა მექანიზმი გვაქვს იმისთვის, რომ არ გავაყალბებინოთ არჩევნები „ქართულ ოცნებას“, სანამ თქვენ საბოლოო გადაწყვეტილებებს იღებთ, თქვენივე შტაბებიდან გვაწვდიან ამ ინფორმაციას, თქვენივე დანიშნული საოლქოს წევრები გვაქვდიან, იცით რატომ? იმიტომ, რომ ხალხს მობეზრდა თქვენი გაყალბების მაქინაციები და არც ერთ შემთხვევაში არ დავუშვებთ იმას, რომ გაგაყალბებინოთ არჩევნები და ვინმეს აჩუქოთ გამარჯვება ამ არჩევნებში, გაერთიანებული ოპოზიცია ყველაფერს გააკეთებს იმისთვის, რომ საქართველოს მოქალაქეების არჩევანი არ დაიკარგოს 28 ოქტომბრის არჩევნებში. მე მოვუწოდებ მოსახლეობას, უნდა იყოს ყველა ამომრჩეველი მისული საარჩევნო უბანზე, რომლებიც თვითონ მიიღებენ გადაწყვეტილებას და აბა გაბედოს თამარჟვანიამ და მისმა შექმნილმა საარჩევნო გაყალბების მექანიზმა, არასწორად დაითვალოს ეს ხმები, მიიღებთ საკადრის პასუხს“, - განაცხადა გიორგი ვაშაძემ.