მამუკა ბახტაძის თქმით, რუსულ პროპაგანდაზე საუკეთესო პასუხი სიღარიბის აღმოფხვრაა

პოლიტიკა - 12:23, 11 Sep, 2018

1017

"რამდენად მწვავედ დგას საქართველოში რუსული პროპაგანდის საკითხი?" - ამის შესახებ კითხვა საქართველოს პრემიერს გავლენიანი ამერიკული გამოცემის „ფაინენშალ თაიმსის“ ჟურნალისტმა, თბილისში მიმდინარე ჯონ მაკკეინის სახელობის საერთაშორისო კონფერენციაზე გამოსვლისას დაუსვა.

მამუკა ბახტაძის თქმით, რუსულ პროპაგანდაზე საუკეთესო პასუხი სიღარიბის აღმოფხვრაა.

"საქართველოში რუსეთის პროპაგანდა მნიშვნელოვანი საკითხია და არავის უკვირს, რომ რუსეთი ცდილობს, მოახდინოს გავლენა საზოგადოებრივ აზრზე და შეცვალოს პოზიცია, რომელის ქართველ ხალხს ნატო-სა და ევროკავშირში საქართველოს გაწევრიანებას ეხება. თუმცა, მოსკოვმა წარმატებას ვერ მიაღწია. მიუხედავად ამისა, ჩვენ ფრთხილად უნდა ვიყოთ და უნდა ვითანამშრომლოთ პარტნიორებთან. ჩემი აზრით, უმთავრესი მაინც არის ეკონომიკა. ჩვენ უნდა შევამციროთ სიღარიბე და ეს იქნება საუკეთესო პასუხი გამოწვევაზე. სამწუხაროდ, სიღარიბე ხშირად ქმნის საუკეთესო ფონს და წინაპირობას ნაციონალიზმისა და ქსენოფობის აღმოცენებისთვის. რუსული პროპაგანდა ამ სისუსტეების გამოყენებას ცდილობს. საპასუხოდ ჩვენ უნდა გავზარდოთ ეკონიმიკის განვითარების ტემპი. კიდევ ერთი რეფორმა გასატარებელია განათლების სფეროში. ჩვენ დღეს ფოკუსირებული ვართ ადამიანურ რესურსზე, რადგან ეს პირდაპირაა მიბმული ეკონომიკის კონკურენტუნარიანობის ამაღლებაზე და სიღარიბის აღმოფხვრაზე. დარწმუნებული ვართ, რომ რუსეთის პროპაგანდა ვერასდროს მიაღწევს წარმატებს საქართველოში. თუ შეხედავთ უკანასკნელი არჩევნების შედეგებს, პრორუსული პარტიები ხუთ პროცენტზე მეტს ვერ იღებენ. ქართველების უმრავლესობა მხარს უჭერს ნატო-სა და ევროკავშირში გაწევრიანებას" - აღნიშნა პრემირმა.