"დიდი შანსია, თაღლითობა იყოს" - უმრავლესობა "იბერიას" საქმეზე გავრცელებულ სკანდალურ ჩანაწერს არ ენდობა, პროკურატურა დუმს

პოლიტიკა - 12:12, 11 Sep, 2018

1013

სკანდალურ ჩანაწერს, სადაც ლევან ყიფიანი ამბობს, რომ "ომეგა ჯგუფის" პრობლემებს უჩა მამაცაშვილი აგვარებდა, სანაცვლოდ კი ორ მილიონს ითხოვდა, საპარლამენტო უმრავლესობის წევრები ეხმაურებიან.

"უნდა დადგინდეს, არის თუ არა გავრცელებული ჩანაწერი ავთენტური. დიდი შანსია, რომ ეს იყოს თაღლითობა. ადრე ამას აფერისტობა ერქვა, როცა ადამიანები ახსენებენ კონკრეტულ სახელებს, რომ მათ აქვთ თითქოს უფლებამოსილება გადაწყვიტონ საკითხები. რაც კაცობრიობა არსებობს, ასეთი აფიორებიც არსებობს. ამიტომ შეიძლება იყოს თაღლითობა, შეიძლება იყოს კორუფციის ნიშნები. უნდა დადგინდეს არის თუ არა სიმართლე. თუ სიმართლეა უმკაცრესი რეაგირება იქნება საჭირო, მაგრამ ეს არ ათავისუფლებს ტელეკომპანია ,,იბერიას’’ ვალდებულებისგან, რომ გადასახადები გადაიხადონ. მფლობელები ჟურნალისტებზე ზეწოლას ახდენენ. ჩვენი მიზანია, გადასახადები ამოვიღოთ, იყოს სამუშაო ადგილები და არა ის, რომ ვიღაც გააჩერო და დააჯარიმო. გადასახადის გადახდის ვალდებულებისგან მედია თავისუფლებაზე აპელირება არ ათავისუფლებს", - განაცხადა ზოიძემ.

საპარლამენტო უმრავლესობაში ირწმუნებიან, რომ მედიათავისუფლებას მმართველი გუნდი საფრთხეს არ შეუქმნის, ხოლო თუ ბიზნეს დავებთან დაკავშირებით კითხვები არსებობს ამაზე პასუხი შესაბამისმა უწყებებმა უნდა გასცენ.

ირაკლი სესიაშვილის თქმით, მიუღებელია, როცა ზოგიერთი ბიზნესმენი ცდილობს, საკუთარი ბიზნესი მედიის ფარდას ამოაფაროს.

"სასურველი მაქსიმალურად უზრუნველყოფილი იყოს მედიის თავისუფლება, თუ ვინმეს კითხვები აქვს ჩვენი შესაბამისი ორგანო ჩაერთვება და დაინტერესდება"-ამბობს სესიაშვილი.

არჩილ თალაკვაძის განცხადებით, უსაფუძვლოა ტელეკომპანიის თანამშრომელთა განცხადებები, რომლებიც ხელისუფლების მხრიდან ზეწოლაზე საუბრობენ.

„ღიმილისმომგვრელია ბრალდებები, რომ ხელისუფლება სურს თითქოს, რომელიმე ტელევიზიის მითვისება, ჩვენ არაერთხელ გვქონდა შესაძლებლობა და რესურსი შეგვექმნა ახალი მედია, განგვევითარებინა ის, მაგრამ მიგვაჩნია, რომ ეთიკის საკითხია, რომ სახელისუფლებო გუნდს არ ჰქონდეს თავის საკუთარი მედია, ამიტომ ჩვენ ერთგულნი ვრჩებით მედიათავისუფლების, გვჭირდება კრიტიკული და დამოუკიდებელი მედია“-აცხადებს საპარლამენტო უმრავლესობის ერთ-ერთი ლიდერი არჩილ თალაკვაძე.

რაც შეეხება შეკითხვას, იკვეთება თუ არა დანაშაულის ნიშნები როცა ჩანაწერის მიხედვით, საუბარია იმაზე, რომ ბიძინა ივანიშვილის დეიდაშვილი, უჩა მამაცაშვილი 2 მილიონს ითხოვს, თანხიდან კი ნაწილს ბიუჯეტში შეიტანს, ნაწილს კი დაიტოვებს - თალაკვაძე ამბობს:

„კონკრეტული ბრალდებები უნდა შეფასდეს კანონმდებლობის გადმოსახედიდან, მე შემიძლია მხოლოდ პოლიტიკური შეფასება გავაკეთო“.