"მაკკეინი საქართველოს ერთგული ბოლომდე დარჩა"

პოლიტიკა - 11:20, 08 Sep, 2018

1233

სენატორი ჯონ მაკკეინი აშშ-ში საქართველოს ერთ-ერთი ყველაზე მტკიცე მხარდამჭერი იყო. რენდი შუნემანი მასთან წლების მანძილზე მუშაობდა. 2008 წელს შუნამენი მაშინ საპრეზიდენტო კანდიდატ მაკკეინის საარჩევნო კამპანიის საგარეო ურთიერთობების მიმართულების დირექტორი იყო. შუნემანს, რომელიც მაკკეინის საქართველოში პირველ ვიზიტს და საქართველოსადმი მის სიყვარულს იხსენებს, "ამერიკის ხმის" ჟურნალისტი ია მეურმიშვილი ესაუბრა.

"სენატორმა მაკკეინმა ერთხელ თქვა, რომ საქართველოს მიმართ მისი ერთგულება არ განისაზღვრება იმით, თუ რომელი ლიდერი თუ პარტიაა ხელისუფლებაში და დასძინა, რომ მისთვის მთავარი ისაა, თუ რა არის კარგი საქართველოს სახელმწიფოსთვის და ხალხისთვის"- აცხადებს შუნემანი.

რენდი შუნემანი "ამერიკის ხმასთან" აღნიშნავს, რომ მაკკეინს სააკაშვილთან ახლო ურთიერთობა ჰქონდა.

"2008 წელს საპრეზიდენტო კამპანიის დროს, პენსილვანიაში ამომრჩეველს ვხვდებოდით. მანამდე, რამდენიმე დღით ადრე რუსეთი საქართველოში შეიჭრა. მაშინ მაკკეინმა ცნობილი განცხადება გააკეთა. მან ისაუბრა რუსეთის აგრესიაზე და შემდეგ თქვა: „ახლა ჩვენ ყველანი ქართველები ვართ.“ ეს არ იყო მისთვის წინასწარ მომზადებული ტექსტი ან რაიმე ისეთი, რაზეც სიტყვით გამოსვლამდე შევთანხმდით. ეს სიტყვები მან გულიდან წარმოთქვა და იმის გამო არ უთქვამს, რომ პრეზიდენტ სააკაშვილთან ახლო ურთიერთობა ჰქონდა. მას მტკიცედ სჯეროდა, რომ ქართველ ხალხს თვითდამკვიდრების და საკუთარი მომავლის არჩევის უფლება აქვს და რომ მსოფლიო ქართველ ხალხს გვერდში უნდა დადგომოდა"- აღნიშნა რესპოდენტმა.

შუნემანის განცხადებით, მაკკეინი საქართველოს ერთგული ბოლომდე დარჩა. მან მაკკეინის საქართველოში პირველი ვიზიტი გაიხსენა:

ეს 1997 წლის ზაფხულში იყო. ის ტური სენატორის ერთგვარი ეპოქალური ტური იყო, რომელიც თურქეთში დაიწყო და სამი კვირის შემდეგ ჩინეთში დამთავრდა. მაშინ საქართველოში დაუვიწყარი 24 საათი გავატარეთ. ვახშამზე ზურაბ ჟვანია გაგვიმასპინძლდა ტრადიცული ქართული სუფრით, სადღეგრძელოებით და ქართული სტუმართმოყვარეობით. ამ ვიზიტის შემდეგ საქართველოს სენატორ მაკკეინის გულში ყოველთვის განსაკუთრებული ადგილი ეკავა. ამ ვიზიტის შემდეგ წლების მანძილზე ის საქართველოს ერთგული ბოლომდე დარჩა. მის წიგნში, რომელიც ორიოდე თვის წინ გამოიცა, ის საქართველოში გატარებულ დროზე ემოციურად საუბრობს.
იხილეთ სრულად ამერიკის ხმაზე.