მიღებული იქნა გადაწყვეტილება, რომ მინარეთი სოფელ ჭელაში დასაწყობდეს, დაილუქოს და არ მოხდეს მისი აღმართვა, ვიდრე არ მოწესრიგდება მისი საკანონმდებლო ბაზა:

"დღეს საქართველოს საპატრიარქოში, შედგა კათოლიკოს პატრიარქისა და მღვდელმთავრების შეხვედრა, საქართველოს მუსლიმ რელიგიურ ლიდერებთან ადიგენის რაიონში განვითარებული მოვლენების გამო.

საქართველოს საპატრიარქო აბსოლუტურად ეთანხმება მართლმადიდებელი მრევლის სამართლიან პროტესტს, მომხდართან დაკავშირებით. 
ამასთან, ვითვალისწინებთ რა მუსლიმი მოსახლეობის განწყობას, მუსლიმთა სამმართველოსთან შეთანხმებით ვაცხადებთ შემდეგს:

პირველი - მინარეთი დასაწყობდეს სოფელ ჭელაში ნეიტრალურ ადგილზე, დაილუქოს და იყოს დაცული სახელმწიფოს მიერ.

მეორე - არ მოხდეს მისი სადმე აღმართვა, ვიდრე არ მოწესრიგდება საკანონმდებლო ბაზა და არ შედგება მოლაპარაკება საპატრიარქოსა და მუსლიმთა სამმართველოს შორის.

მესამე - ეთხოვოს ხელისუფლებას დაიწყონ მუშაობა, რათა კანონით განისაზღვროს რელიგიური ნაგებობების მშენებლობის მიზანშეწონილობისა და ნებართვის გაცემის საკითხი, რათა თავიდან იქნას აცილებული რელიგიურ ნიადაგზე შფოთი და დაპირისპირება. 
ამასთან, მივმართავთ როგორც ქრისტიან, ისე მუსლიმ მრევლს თავი შეიკავონ გამოსვლებისაგან, შეინარჩუნონ სიმშვიდე და ურთიერთპატივისცემა", - ნათქვამია განცხადებაში.