„ოცნების“ ოცნებად დარჩენილი ოცნება - მმართველი გუნდის გახუნებული ბანერი

პოლიტიკა - 10:38, 07 Sep, 2018

1234

ერეკლე მეორეს მოედანზე, „ქართული ოცნების“ მთვარი ოფისის მთავარ კედელზე დღესაც თვალში მოგხვდებათ უშველებელი ბანერი, რომელზეც ლურჯზე თეთრი ასოებით წერია - „გააგებინე შენი ხმა მთელ ქვეყანას! საპრეზიდენტო არჩევნები!“ ეს ბანერი „ოცნებამ“ ჯერ კიდევ გაზაფხულზე გამოფინა. როგორც ჩანს, მაშინ მმართველი გუნდი დარწმუნებული იყო, რომ საპრეზიდენტო არჩევნებში საკუთარი კანდიდატი ეყოლებოდა, მაგრამ დღევანდელი მონაცემებით, „ოცნების“ ოცნება ოცნებად დარჩა - მმართველ პარტიას არათუ საპრეზიდენტო კანდიდატი ჰყავს, არამედ, დღემდე ვერ გადაუწყვეტია, რომელ დამოუკიდებელ კანდიდატს „გაუგორებს კოჭს“. ისე, კულუარებში ამბობენ, რომ სალომე ზურაბიშილის ოცნებამაც ჩაილურის წყალი დალია და მმართველი გუნდის მხარდაჭერის იმედი არ უნდა ჰქონდეს. რატომ არ დაასახელა „ოცნებამ“ საპრეზიდენტო კანდიდატი? - ვერ ვიტყვით, რომ ეს საუკუნის კითხვაა, თუმცა მაინც, საინტერესოა, რატომ გამოაცხადა კაპიტულაცია ივანიშილის პოლიტიკურმა გუნდმა. შესაძლოა, ეს გადაწყვეტილება იმიტომ მიიღო, რომ მოგების იმედი არ ჰქონდა და იფიქრა, არმონაწილეობით დემოკრატიის ხარისხს „ავწევო“, მაგრამ ბრძოლის ველიდან გაქცევა ლიდერთა თვისება ნამდვილად არ არის.