მეორე პირი ნოდარ გუგეშაშვილის მკვლელობის საქმეში - ახალი დეტალები და დოდო გუგეშაშვილის სკანდალური განცხადება

პოლიტიკა - 14:01, 06 Sep, 2018

3970

თადარიგის პოლკოვნიკი, დოდო გუგეშაშვილი "ნიუპოსტთან" სკანდალურ განცხადებას აკეთებს და ამბობს, რომ არსებობს მეორე პიროვნებაც, გარდა იმისა ვინც, უშუალოდ მოკლა მისი ვაჟი, 33 წლის ნოდარ გუგეშაშვილი.

დოდო გუგეშაშვილი იხსენებს, რომ მკვლელობაში ბრალდებული მას პირველად სწორედ აღნიშნულ პირთან ერთად შეხვდა.

„მკვლელს პირველად ვეტერანთა სამსახურის შენობასთან შევხვდი. მანქანაში იჯდა ორი პიროვნება. ერთი, ვინც უშუალოდ მოახდინა გასროლა ჩემი მისამართით და მომიკლა შვილი, მეორე პირი კი მაშინ პირველად და უკანასკნელად ვნახე. მე მისი სახე ფაქტობრივად არ მინახავს, ძირითადად, მკვლელი საუბრობდა, მეორე პირს კი თავის კი არ მოუტრიალებია, წინა სავარძელზე, უხმოდ იყო. ბუნებრივია, ეს არ იყო შემთხვევითი პირი. აღსანიშნავია, რომ მას მერე კონკრეტულად ეს პირი არ გამოჩენილა. რაც შეეხება მკვლელს, მან ჩემთან კომუნიუკაცია ამ შეხვედრიდან დაახლოებით, 4 თვის შემდეგ განაახლა"- განაცხადა გუგეშაშვილმა.

მისი თქმით, უცნობი პირის შესახებ ინფორმაცია მიაწოდა სამართალდამცავებს, თუმცა თადარიგის პოლკოვნიკი ამბობს, რომ გამოძიებას 7 თვის მანძილზე კონკრეტული შედეგი არ დაუდია.

"გამოძიების მხრიდან კონკრეტული, ხელმოსაჭიდი გარემოება არ არის. გუშინაც ვიყავი სამმართველოში, პერიოდულად ვეცნობი სიახლეებს, თუმცა გამოძიება წინ ვერ მიდის"- თქვა გუგეშაშვილმა.

მისივე თქმით, სიახლე არ არის მის კიდევ ერთ სკანდალურ განცხადებაზე, რომლის თანახმადსაც, გუგეშაშვილის მკვლელობა რუსმა გენერალმა დაუკვეთა.