დამოუკიდებელ ევროპელ ექსპერტზე განხორციელებულ ინტერნეტთავდასხმას არასამთვრობო ორგანიზაციები ეხმაურებიან.

მათი შეფასებით, ნონა მიხელიძეზე სოციალურ ქსელებში გავრცელებული ყალბი ფოტოები და მუქარა ხელისუფლების მართულია.

არასამთავრობოების შეფასებით, საქართველოს მთავრობის მიერ წარმოებული შავი PR კამპანია ექსპერტის წინაამდეგ რუსული მეთოდია.

„მმართველი გუნდისთვის მიუღებელია იმ ანგარიშის შინაარსი, რომელიც სოლიდური ორგანიზაციის მხრიდან გამოქვეყნდა. ეს სტილი - პიროვნულ თავდასხმებზე გადატანა და სოციალურ ქსელში ტროლების მეშვეობით პიროვნების ბულინგი დამახასიათებელია რუსული ხელწერისთვის. სამწუხაროა, რომ მმართველი ელიტა ლახავს იმ წითელ ზღვარს, ვინაიდან შესაძლოა, არ მოგწონდეს ანგარიშის შინაარსი, მაგრამ ამისთის გვაქვს ჯანსაღი დისკუსიის ფორმატი, რომ კრიტიკაზე არგუმენტირებულად ვუპასუხოთ და არ მოხდეს ადამიანის პიროვნული დისკრედიტაცია,“- განაცხადა მედიის განვითარების ფონდის აღმასრულებელი დირექტორმა, თამარ კინწურაშვილმა.

ევროპარლამენტში მწვავე და კრიტიკული ანგარიშის ავტორი ნონა მიხელიძე, ინტერნეტ თავდასხმის ობიექტი გახდა. ევროკავშირის მიერ დაქირავებული ექსპერტი, ამბობს, რომ ბრიუსელში გამოსვლის შემდეგ, მას პირად მესიჯებსაც უგზავნიან და ემუქრებიან. რომში მცხოვრები ქართველი სპეციალისტის დისკრედიტაციას ძირითადად ის ინტერნეტ-გვერდები ეწევიან, რომლებიც ოპოზიციის შავ პიარზე მუშაობენ. ინტერნეტ ტროლები, არა მხოლოდ ნონა მიხელიძეს, არამედ მისი ოჯახის წევრებსაც, ავიწროებენ.