"ჩვენი გამარჯვების შემდეგ, საჯარო სამსახურში მხოლოდ პროფესიონალი კადრები დასაქმდებიან"

"ჩვენი გამარჯვების შემდეგ, საჯარო სამსახურში მხოლოდ პროფესიონალი კადრები დასაქმდებიან" - გრიგოლ ვაშაძე

პოლიტიკა - 11:41, 02 Sep, 2018

15883

გაერთიანებული ოპოზიციის „ძალა ერთობაშია“ საპრეზიდენტო კანდიდატი, ქვეყანაში არსებულ მდგომარეობაზე საუბრობს. გრიგოლ ვაშაძის თქმით, დღეს ქვეყნის სათავეში არიან ნეპოტიზმის გზით შერჩეული მარიონეტები, რომელთა მთავარი ამოცანა, ბიძინა ივანიშვილის ერთგულებაა.

ვაშაძეს მიაჩნია, რომ ქვეყანას უნდა მართავდნენ პროფესიონალი ადამიანები. საპრეზიდენტო კანდიდატის თქმით, მისი გუნდის გამარჯვების შემთხვევაში, თანამდებობებზე დანიშვნა საჯარო კონკურსის გზით მოხდება, რაც საშუალებას მისცემს პროფესიონალ ადამიანებს გამოავლინონ საკუთარი ნიჭი და შესაძლებლობა.

„ურთულეს მდგომარეობაში ჩააგდო „ქართულმა ოცნებამ“ ქვეყანა. სახეზე გვაქვს გაჭირვება, უმუშევრობა, ეკონომიკური დაღმასვლა, საგარეო ასპარეზზე საქართველოს ფუნქციისა და როლის დაკნინება. სამწუხაროდ, ბიძინა ივანიშვილმა გადაწყვიტა, მაღალ თანამდებობებზე და ზოგადად, სახელმწიფო სამსახურში ყავდეს მხოლოდ მარიონეტები. კადრების შერჩევის მექანიზმი არის ნეპოტიზმი, ნათესაობა, ბიძაშვილობა, მამიდაშვილობა და ერთგულება ივანიშვილისადმი და „ქართული ოცნებისადმი“. საბოლოო ჯამში, ქვეყანას, პროფესიონალების ნაცვლად, მართავენ მარიონეტები, ადამიანები, რომელთა მთავარი ამოცანაა არა მოქალაქის პრობლემების მოგვარება და ქვეყნის განვითარება, არამედ საკუთარ კეთილდღეობაზე ზრუნვა. ეს ადამიანები ყვლეფენ სახელმწიფო ბიუჯეტს, აფორმებენ ხელშეკრულებებს ერთ პირთან მოლაპარაკების გზით და იღებენ დიდი ოდენობით პრემია-დანამატებს.

საქართველოში გვყავს ძალიან ბევრი ნიჭიერი და პროფესიონალი ადამიანი. დანაშაულია, მათი რესურსის არ გამოყენება. ქართველები მუშაობენ ძალიან ბევრ საერთაშორისო ორგანიზაციაში: უკრაინაში, მოლდოვაში, ალბანეთში, ამერიკის შეერთებული შტატებში, ბრიტანეთში და სხვა. წარმატება გადის იმაზე, თუ რამდენად გაუხსნი გზას ადამიანებს, რამდენად მერიტოკრატიული იქნება შერჩევის მექანიზმი საჯარო სამსახურში. საერთაშორისო ორგნიზაციების თითქმის ყველა წარმომადგენლობაში მუშობენ ქართველები. მონაწილეობენ რეფორმების განხორციელებაში, ჩართულები არიან სხვადასხვა საერთაშორისო მასშტაბის პროექტებში. რატომ არ უნდა ვაძლევდეთ ჩვენ ამ ადამიანებს საკუთარ სამშობლოში იგივეს კეთების საშუალებას? რატომ არ უნდა ვიყენებდეთ მათ ნიჭს ჩვენს სასარგებლოდ? „ძალა ერთობაშია“გაერთიანდა ერთი მთავარი იდეის გარშემო - ქვეყანას უნდა მართავდნენ პროფესიონალებით. სწორედ ამიტომ, ჩვენი გამარჯვების შემდეგ, ერთ-ერთი მთავარი ამოცანა პროფესიონალი კადრების დასაქმება იქნება. თითოეულ მათგანს გავუხსნით კარს და საჯარო სამსახურებში მხოლოდ ღია კონკურსით დავნიშნავთ ადამიანებს. ქვეყნის სათავეში უნდა იყვნენ ადამიანები, ვინც რეალურად არის საკუთარი საქმის პროფესიონალი და ვისაც სამშობლოსთვის უძგერს გული“- განაცხადა გრიგოლ ვაშაძემ.