ევრაზიული ინსტიტუტი "ინფო 9 -ის" და "მეცხრე არხის" შეძენის სურვილს გამოთქვამს

საზოგადოება - 18:02, 28 Aug, 2013

741

"ბატონი ბიძინა ივანიშვილის კუთვნილებაში არსებული საინფორმაციო სააგენტო "ინფო 9" და ტელევიზია "ტვ 9", მათი გასხვისების შემდეგ, ევრაზიის ინსტიტუტის წევრების აზრით, შესაძლოა, ჩამოყალიბდნენ სრულიად განსხვავებულ და ძალზე ეფექტურ მედია-საშუალებებად", - აცხადებს ინსტიტუტი, მათი აზრით, აუცილებელია შეიქმნას იდეოლოგიურად სრულიად განსხვავებული და დამოუკიდებელი მასმედია, რაც "ესოდენ დიდი დეფიციტია დღევანდელ ქართულ მედიაბაზარზე."

"იმ შემთხვევაში, თუკი "ინფო 9" და "ტვ 9" გადმოეცემა ევრაზიის ინსტიტუტს, მკაცრად აღიკვეთება დილეტანტიზმი, დამკვიდრდება სალიტერატურო ქართული ენის ნორმები, უხვად მომზადდება საგანმანათლებლო ტიპის გადაცემები, დიდი ყურადღება დაეთმობა კულტურას, მეცნიერებას, სპორტს, საბავშვო გადაცემებს. გამორიცხული იქნება მდარე ხარისხის სერიალების, პორნოგრაფიული ელფერის მქონე ფილმების, უხამსობის, ძალადობისა და სხვა მანკიერებათა ჩვენება ტელეეკრანზე, საინფორმაციო პოლიტიკა კი იქნება მიუკერძოებელი და ამავე დროს, პროფესიონალიზმზე დაფუძნებული. ტრიბუნა დაეთმობათ საქართველოში არსებული ნებისმიერი პოლიტიკური ორიენტაციის წარმომადგენლებს, სიღრმისეულად გაშუქდება უცხოეთში მიმდინარე მოვლენებიც", - ნათქვამია ინსტიტუტის მიერ გავრცელებულ განცხადებაში.