"გრიგოლ ვაშაძის განცხადება, რომელსაც "იმედი" არასწორ კონტექსტში ატრიალებს, გაკეთებულია 2008 წლის ომამდე" - გაერთიანებული ოპოზიცია ჟურნალისტური ეთიკის ქარტიას საკითხის შესწავლას მოუწოდებს

პოლიტიკა - 12:32, 31 Aug, 2018

1350

გაერთიანებული ოპოზიციის პრეზიდენტობის კანდიდატის, გრიგოლ ვაშაძის, საარჩევნო შტაბის ხელმძღვანელი გიორგი ვაშაძე ტელეკომპანია "იმედს" Fake ნიუსის გაცრცელებაში ადანაშაულებს.

„უკვე ორი დღეა, ტელეკომპანია "იმედის" მეშვეობით ხდება ე.წ. Fake ნიუსის გავრცელება ჩვენს კანდიდატთან, გრიგოლ ვაშაძესთან, მიმართებაში,“ - თქვა ვაშაძემ დღეს გამართულ ბრიფინგზე.

ვაშაძე ჟურნალისტური ეთიკის ქარტიას მიმართავს, რომ საკითხის შესწავლა დაიწყოს.

„გვესმის, რომ ჩვენი კონკურენტები შეშფოთებულები არიან უკანასკნელი კვლევებით, სადაც ლიდერობს გრიგოლ ვაშაძე იმიტომ, რომ ის არის ღირსეული კანდიდატი, რომელიც დიდ როლს შეასრულებს, როგორც საქართველოს პრეზიდენტი მომავალში. განცხადება, რომელიც არის გაკეთებული გრიგოლ ვაშაძის მიერ, რომელსაც ატრიალებს არასწორ კონტექსტში ტელეკომპანია იმედი, გაკეთებულია 2008 წლის ომამდე. ეს განცხადება პირიქით მიუთითებს, რომ მაშინდელი ხელისუფლება ყველაფერს აკეთებდა, რომ თავიდან აერიდებინა შეიარაღებული კონფლიქტი და ის აგრესია, რაც რუსეთის ფედერაციის მხრიდან მივიღეთ. იმედი ისე აშუქებს, რომ თითქოს, ეს განცხადება ომის მიმდინარეობის პერიოდშია გაკეთებული და სპეციალურად ამახინჯებს ფაქტებს. მივმართავ ჟურნალისტიკის ეთიკის ქარტიას, შეისწავლოს ეს სიუჟეტები თავიდან ბოლომდე იმიტომ, რომ ეს არღვევს ყველა ნორმას. არ შეიძლება, მედიასაშუალებები ფაქტებს თავიდან ბოლომდე ამახინჯებდნენ,“ - აღნიშნა ვაშაძემ.