საგანგაშო სიგნალი ხელისუფლებისთვის - ოპოზიცია ევროპარლამენტის ანგარიშს ეხმაურება

პოლიტიკა - 11:38, 31 Aug, 2018

1267

საქართველოსთან ასოცირების ხელშეკრულების შესრულების შესახებ ოფიციალური ანგარიშის ალტერნატიულ მოხსენებას, რომელიც მიწვეული ექსპერტის ნონა მიხელაძის მიერ იყო მომზადებული, საქართველოში დიდი გამოხმაურება მოჰყვა. ანგარიშში წარმოდგენილ უმკაცრეს კრიტიკას ოპოზიცია "ხელისუფლებისთვის საგანგაშო სიგნალს" უწოდებს.

„ევროპულ საქართველოში“ აცხადებენ, რომ ანგარიშში ზუსტად არის აღწერილი ის პრობლემები, რომლებიც დღეს აქვს საქართველოს:

„ზუსტად არის აღწერილი ის პრობლემები, რომლებიც დღეს აქვს საქართველოს, დაწყებული არაფორმალური მმართველობით, დასრულებული ქვეყანაში დემოკრატიასთან დაკავშირებით არსებული გამოწვევებით. სამწუხაროდ საქართველოს ხელისუფლებამ ნაცვლად იმისა, რომ გაეთვალისწინებინა ეს რეკომენდაციები და კონსტრუქციულად მოკიდებოდა, პირიქით შეეწინააღმდეგა მას და წარმოაჩინა, თითქოს ეს არის დამაზიანებელი ჩვენი ქვეყნისთვის“- განაცხადა ევროპული საქართველოს წევრმა სერგი კაპანაძემ.

ენმ-ს წევრის თინა ბოკუჩავას თქმით, საქართველოსთან ასოცირების ხელშეკრულების შესრულების პრობლემები აჩვენებს იმას, რომ ივანიშვილის მმართველობის პერიოდში საქართველო ვერ გახდება ევროკავშირის წევრი:

„ნამდვილად კონსოლიდაცია ხდება საერთაშორისო საზოგადოებაში, რომ ივანიშვილის მმართველობის პერიოდში საქართველო ვერ გახდება ევროკავშირის წევრი.“- განაცხადა თინა ბოკუჩავამ.

ოპოზიციისგან განსხვავებული მოსაზრება აქვს, უმრავლესობის წევრ დიმიტრი ცქიტიშვილს. მისი განცხადებით რეალური შეფასებები მოცემულია ოფიციალურ ანგარიშში , რომელიც ევროპარლამენტარმა ანდრეს მამიკინსმა მოამზადა:

„რეალური შეფასებები არის მოცემული იმ ანგარიშში, რომელიც არის მომხსენებლის მიერ წარმოდგენილი, ასევე ევროკომისიის მიერ შესწავლილი და ობიექტურად დადასტურებული ინფორმაციები, რომელიც გათვალისწინებული იქნება ანგარიშის საბოლოო დამუშავებისას, თუმცა ცალკეულ პოლიტიკურ ჯგუფებს ექნებათ განსხვავებუკლი აზრები და შეფასებები, მაგრამ აქ მთავარია, როგორ ხედავენ ამას კონკრეტულად, პროფესიულად დამოკიდებულებაში მყოფი ადამიანები.“- განაცხადა დიმიტრი ცქიტიშვილმა.