წინასაარჩევნო დარღვევებზე ოპოზიცია უწყებათაშორის კომისიას მიმართავს და წულუკიანის ჩამოშორებას ითხოვს

პოლიტიკა - 11:09, 31 Aug, 2018

910

წინასაარჩევნო პერიოდში გასაჯაროებულ დარღვევებთან დაკავშირებით ოპოზიცია უწყებათაშორის კომისიას მიმართავს და საკითხის დღის წესრიგში შეტანას და მასზე რეაგირებას ითხოვს. მათი თქმით, აღნიშნული დარღვებები საფრთხეს უქმნის არჩევნების ლეგიტიმურობას.

ოპოზიციის ნაწილი უწყებათაშორისო კომისიიდან თეა წულუკიანის ჩამოშორებას ითხოვს, მათი თქმით, იუსტიციის მინისტრის პირობებში, კომისია ობიექტურ გადაწყვეტილებებს ვერ მიიღებს.

„ჩვენ მოვითხოვთ, რომ საერთოდ ეს უწყება ჩამოშორდეს თეა წულუკიანს და ჩაბარდეს ან არასამთავრობო სექტორს, ან საერთაშორისო ორგანიზაციებს, ვინმე ისეთს, რომელსაც ექნება რეალურად იმის ინტერესი, რომ ქვეყანაში ჩატარდეს სამართლიანი არჩევნები. იმიტომ, რომ წულიკიანი ამის ნაცვლად, არის ერთ-ერთი მთავარი შემქმნელი არჩევნების გაყალბების მექანიზმისა.“- განაცხადა ენმ-ს წევრმა თინა ბოკუჩავამ.

„ევროპულ საქართველოში“ აცხადებენ, რომ უწყებათაშორისი კომისია არის ქართული ოცნების პარტიული მმართველობის აბსოლუტურად უფუნქციო დანამატი:

„ეს არის ქართული ოცნების პარტიული მმართველობის აბსოლუტურად უფუნქციო დანამატი და მცდელობა, რომ არჩევნებში მთელი რიგი დარღვევებით მოიპოვოს უპირატესობა ოპოზიციაზე. ჩვენ მუდმივად წარვადგენთ იქ დარღვევების შესახებ ინფორმაციას, თუმცა არ გვაქვს იმედი, რომ მათგან იქნება რეალური რეაგირება.“- განაცხადა ევროპული საქართველოს წევრმა ირაკლი აბესაძემ.