ახალგაზრდა იურისტები თეა წულუკიანს ანგარიშსწორებაში ადანაშაულებენ

პოლიტიკა - 19:50, 29 Aug, 2018

1201

ახალგაზრდა იურისტები იუსტიციის მინისტრს თეა წულუკიანს უწყებათაშორისო კომისიის ფორმატის პირადი მიზნების გამოყენებაში ადანაშაულებენ.

უფრო კონკრეტულად საქმე ეხება კვლევას, რომელიც საიამ ცოტა ხნის წინ გაავრცელა, სადაც საუბარი საარჩევნო ადმინისტრაციებში წევრების ნათესაური და მეგობრული კავშირებით დანიშვნაზე იყო.

როგორც ასოციაციაში აღნიშნავენ, ნაცვლად იმისა, რომ კომისიამ წინასაარჩევნო დარღვევებზე ადეკვატური რეაგირება მოახდინოს, სადამკვირვებლო ორგანიზაციას თავს ესხმის.

„ჩვენ ვსაუბრობდით სავარაუდო შემთხვევებზე, რომელიც შეიძლება დაკავშირებული ყოფილიყო ნათესაურ კავშირებთან ამ სხვა ტიპის კავშირებთან. რამაც, შესაძლოა გავლენა მოახდინა კონკრეტული წევრების ადმინისტრაციაში დანიშვნასთან მიმართებით. ეს იყო ინფორმაცია, რომელიც ნაწილი მედიაში გავრცელდა, ნაწილი ჩვენ თავად გადავამოწმეთ, ჩვენი რეგიონული ოფისების თანამშრომლების საშუალებით. ნაცვლად იმისა, რომ ამ ინფორმაციის შესწავლა მოეხდინა უწყებათაშორის კომისიაზე და გადაემოწმებინა რამდენად რეალური შეიძლება ყოფილიყო, მინისტრის მხრიდან ხდებოდა დემონსტრირება, მხოლოდ ცალმხრივი განხილვა ამ დოკუმენტის, ითხოვდა ისეთ მტკიცებულებებს, რომლის პირდაპირი შექმნა და მოტანა შეუძლია მხოლოდ კონკრეტულ სახელმწიფო უწყებებს და მათ ხელეწიფებათ ამის გადამოწმება" - განაცხადა საქართველოს ახალგაზრდა იურისტთა ასოციაციის თავმჯდომარემ, სულხან სალაძემ.

თეა წულუკიანი ახალგაზრდა იურისტთა ასოციაციას ცენტრალური საარჩევნო კომისიის დისკრედიტაციაში ადანაშაულებს.