"პრეზიდენტმა არ უნდა წარადგინოს თავმჯდომარის კანდიდატურა"- ბეჟაშვილი პრეზიდნტს აკრიტიკებს

პოლიტიკა - 14:40, 27 Aug, 2018

1001

ლევან ბეჟაშვილის განცხადებით, უზენაეს სასამართლოს თავმჯდომარის მიმართ არსებული ვითარება არალოგიკურია.

მისივე შეფასებით, საქართველოს პრეზიდენტმა საკმაოდ უარყოფითი როლი შეასრულა უზენაეს სასამართლოსთან მიმართებაში, როდესაც თავის დროზე „ქართული ოცნების“ კანდიდატი და პარტიული აქტივისტი წარადგინა უზენაესი სასამართლოს თავმჯდომარის თანამდებობაზე.

„საუბარია, ნინო გვენეტაძეზე და მივიღეთ ისეთი შედეგი, რაც მივიღეთ. დღეს, როდესაც საქართველოს პრეზიდენტის ლეგიტიმაციის ხარისხი ძალიან დაბალია, მაშინ როდესაც უნდა ჩატარდეს ახალი არჩევნები და ხელისუფლების ახალი ლეგიტიმაცია უნდა მოხდეს, საუბარი იმაზე რომ არსებულმა პრეზიდენტმა უნდა წარადგინოს რომელიმე თანადებობის პირი, თუნდაც უზენაესი სასამართლოს რიგითი მოსამართლის კანდიდატურა, არამართებულად მიმაჩნია.

ვფიქრობ, ეს უნდა მოხდეს არჩევნების შემდგომ, როდესაც ხელისუფლება არჩევნების გზით გარკვეულ ლეგიტიმაციას მიიღებს ხალხის მიერ. ახალი კონსტიტუციის თანახმად, პრეზიდენტს არ ექნება კანდიდატის წარდგენის უფლება, მაგრამ არსებული ლეგიტიმაციის ხარისხის მქონე პრეზიდენტის მხრიდან რაიმე კანდიდატურის დასახელება კიდევ ერთხელ მიუთითებს იმაზე, რომ თუ წარდგენილი იქნება შესაბამისი კანდიდატურა, კვლავ მოხდება „ქართული ოცნების“ ინტერესების გათვალისწინება. არსებულ პრეზიდენტს არ უნდა ჰქონდეს არანაირი კანდიდატურის წარდგენის უფლებამოსილება“, - განაცხადა ლევან ბეჟაშვილმა.