ნავალნის 30 დღიანი პატიმრობა ემუქრება - ოპოზიციონერს იანვარში ჩატარებული მიტინგის გამო გაასამართლებენ

მსოფლიო - 12:47, 27 Aug, 2018

2153

ოპოზიციონერმა პოლიტიკოსმა ალეკსეი ნავალნიმ, რომელიც შაბათს, მოსკოვში საკუთარ სახლთან დააკავეს, პოლიციის განყოფილების საკნიდან შეტყობინება გაავრცელა იმის შესახებ, რომ ორშაბათს მას იანვარში ჩატარებული მიტინგის გამო გაასამართლებენ.

კვირას მოსკოვის მერიამ განაცხადა, რომ არ დათანხმდა 9 სექტემბერს საპენსიო რეფორმის წინააღმდეგ დაგეგმილი აქციის ჩატარებას, რომელსაც ნავალნი და მისი მომხრეები გეგმავენ. ალეკსეი ნავალნი თვლის, მისი დაკავება და თვების შემდეგ იმ საქმის განხილვა, რომლის გამოც მას 30 დღიანი ადმინისტრაციული პატიმრობა ემუქრება, ნაკარნახევია ხელისუფლების სურვილით, რომ აქციის დროს მისი იზოლირება მოახდინონ.

„ჩვეულებრისამებრ ცდილობენ აქციის წინა დღეს დაკავებას ხოლმე, ახლა წინ 2 კვირაა. თემა ძალიან მნიშვნელოვანია“- დაწერა ნავალნიმ.

25 აგვისტოს ნავალნი პოლიციის განყოფილებაში ყოველგვარი ახსნა-განმარტების გარეშე გადაიყვანეს. რამდენიმე საათი მასთან არ უშვებდნენ ადვოკატს.

ერთი დღე-ღამის შემდეგ ოპოზიციონერმა თავის საიტზე დაწერა, რომ მას სასამართლოს წინაშე წარადგენენ „ამომრჩევლის გაფიცვის“ აქციასთან დაკავშირებით, რომელიც 28 იანვარს ჩატარდა.

როგორც მედია წერს დაკავების დროს სამართალდამცავებმა ნავალნის ტელეფონი ძალის გამოყენებით წაართვეს, რის გამოც მან ხელზე ტრავმა მიიღო და საავადმოფოში გადაყვანა გახდა საჭირო, სადაც მას წინასწარი დიაგნოზი თითის მოტეხვასთან დაკავშირებით არ დაუდასტურდა და პოლიციის განყოფილებაში დააბრუნეს.

როგორც ჩანს ნავალნის ტელეფონი კვირას დაუბრუნეს და მან საკნიდან დაწერა პოსტი იმის შესახებ, თუ რატომ დააკავეს „შორტებში და საზაფხულო ფეხსაცმელში“ გამოწყობილი.

„ორშაბათს გამასამართლებენ 28 იანვრის მიტინგში მონაწილეობის გამო. ვეკითხები: ნახევარი წელი რას ელოდებოდით? - ამ ხნის განმავლობაში თქვენ პოლიცია გეძებდათ და ვერ გიპოვათო“- წარმოადგინა ნავალნიმ თავისი დიალოგი პოლიციასთან.