მაკკეინის ოჯახი პრეზიდენტის ადმინისტრაციას სთხოვს, დონალდ ტრამპი დაკრძალვის ცერემონიას არ დაესწროს

პოლიტიკა - 18:03, 26 Aug, 2018

3250

სენატორ ჯონ მაკკეინის ცხედარი მისი სახლიდან უკვე გადაასვენეს არიზონას შტატის დედაქალაქ ფინიქსში, სადაც სამოქალაქო პანაშვიდები გაიმართება. ამერიკელ სენატორს ქალაქ ანაპოლისში დაკრძალავენ. ჯონ მაკკეინის ოჯახმა პრეზიდენტის ადმინისტრაციას თხოვნით მიმართა, რომ დონალდ ტრამპი დაკრძალვის ცერემონიას არ დაესწროს და მხოლოდ გამოსამშვიდობებელი სიტყვით შემოიფარგლოს. სენატორის გარდაცვალების გამო მწუხარება ქვეყნის ლიდერმა Twitter-ის ქსელში გამოხატა.

მიუხედავად იმისა, რომ ტრამპი და მაკკეინი ერთ პარტიაში იყვნენ, სენატორი რამდენჯერმე დაუპირისპირდა მას.

პირველი დაპირისპირება 2015 წლის ზაფხულში მოხდა, როდესაც ტრამპი საარჩევნო კამპანიას იწყებდა და მექსიკელ მიგრანტებს დაესხა თავს. მაკკეინი ამ გამოსვლას მყისიერად გამოეხმაურა და ტრამპის გამოსვლა დაგმო.

ტრამპმა ამ გამოსვლას ერთი თვის შემდეგ უპასუხა და განაცხადა, რომ იგი იმ ადამიანებს თვლის გმირებად, რომლებიც მტერმა ვერ დაატყვევა.

მაკკეინმა 2016 წლის საპრეზიდენტო არჩევნების წინ ტრამპი ქალების მისამართით უხამსი გამოთქმისთვის გააკრიტიკა და აღნიშნა, რომ არცერთი ქალი არ იმსახურებს ასეთ დამოკიდებულებს. ამ დროს გამოქვეყნდა ადრე ჩაწერილი ტრამპის ვიდეო, სადაც ის აცხადებს, რომ "თუ თქვენ ვარსკვლავი ხართ, შეგიძლიათ ყველაფერი გააკეთოთ ქალებთან".

მეოთხე დაპირისპირება იმ დროს მოხდა, როდესაც მაკკეინმა ხმა არ მისცა ტრამპის კანონპროექტს, ობამას მიერ მიღებული სადაზღვევო პოლიტიკის ე.წ. Obamacare-ის გაუქმების შესახებ.

შემდეგი ორი დაპირისპირება ტრამპის მიერ პუტინისთვის პრეზიდენტის პოსტზე მეოთხედ არჩევის მილოცვისა და ტრამპი-პუტინის ჰელსინკის შეხვედრის შემდეგ მოხდა.

"აშშ-ის პრეზიდენტი არ უნდა ულოცავდეს დიქტატორებს," - ასეთი განცახდება გააკეთა მაკკეინმა, ხოლო რუსეთ-ამერიკის პრეზიდენტების შეხვედრას მან სამარცხვინო უწოდა.