საქართველოს პრეზიდენტის გადაწყვეტილებას, რომლის მიხედვითაც, გიორგი მარგველაშვილი უზენაესი სასამართლოს თავმჯდომარეობის კანდიდატს აღარ დაასახელებს, საპარლამენტო უმრავლესობის წევრი მამუკა მდინარაძე არაადექვატურს უწოდებს.

“თავიდან არ იცოდა პრეზიდენტმა როდესაც დააანონსა კონსულტაციები, რომ არაადექვატურია დღევანდელი გადაწყვეტილება და რაც უფრო ბოლოსკენ მიდის მისი საპრეზიდენტო ვადა, გადაწყვეტილებების კომენტირება მით უფრო ჭირს, რადგან არაადექვატური ხდება, მან ვერ აიღო პასუხისმგებლობა იმაზე რისი კონსტიტუციური ვალდებულებაც აქვს და ცდილობს ეს გადმოგვაბრალოს ჩვენ. ყველაფერი გააკეთა იმისთვის, რომ არ ყოფილიყო რეალური კონსულტაციები, ან წარმოედგინა, რომელიმე თავის თანამშრომელი და შეეფუთა ეს დემოკრატიად.“- აცხადებს მამუკა მდინარაძე.

შეგახსენებთ, პრეზიდენტი უზენაესი სასამართლოს თავმჯდომარის კანდიდატურის დასახელებაზე უარს აცხადებს. მიზეზად კი ის სახელდება, რომ „ქართულმა ოცნებამ“ კონსულტაციებზე უარი განაცხადა და კანდიდატურასთან დაკავშირებით კონსენსუსი ვერ შედგა. აღნიშნული განცხადება საქართველოს პრეზიდენტის ადმინისტრაციის უფროსმა გიორგი აბაშიშვილმა დღეს ჟურნალისტებთან გააკეთა და აღნიშნა, რომ საქართველოს პრეზიდენტს სურდა ფართო კონსენსუსი შემდგარიყო, რათა კანდიდატურას პარლამენტში დამტკიცების შანსი ჰქონოდა.