გიორგი ბარამიძე საგარეო საქმეთა მინისტრის განცხადებას სიცრუეს უწოდებს - „ისევ ტყუილი გვესმის მთავრობის წარმომადგენლებისგან“

პოლიტიკა - 18:08, 24 Aug, 2018

2417

„ერთიანი ნაციონალური მოძრაობის“ წებრი გიორგი ბარამიძე ტყუილს უწოდებს საგარეო საქმეთა მინისტრის დავით ზალკალიანის იმ განცხადებას, სადაც მინისტრი ამბობს, რომ სააკაშვილის ხელისუფლება ნატოსა და ევროკავშირში გაწევრიანების თაობაზე ცრუ დაპირებებს იძლეოდა.

„ისევ ტყუილი გვესმის მთავრობის წარმომადგენლებისგან.

არასდროს გვითქვამს რომ "ხვალ საქართველოს ნატოში მიიღებენ", ხოლო ის უპრეცედენტო გადაწყვეტილება, რომ "საქართველო გახდება ნატოს წევრი", სწორედ 2008 წელს, NATO-ს ბუქარესტის სამიტმა ჩვენი ხელისუფლების დროს ნამდვილად მიიღო. რაც შერხება MAP-ს ესეც ფაქტია რომ ჩვენ ეს ინსტრუმენტი ფორმალურად არ გვაქვს მაგრამ შინაარსობრივად, არსებითად, 2008 წლიდან მართლაც გვაქვს უფრო მეტი, რადგან გვაქვს MAP-ის ერთადერთი შემადგენელი "წლიური სამოქმედო გეგმა" ANP, რაც როცა გაქვს MAP-ი ყოველ წელს შესასრულებელი რეფორმების დასახელებაა ანუ შინაარსობრივად ოღონდ არა იურიდიულად, ფაქტიურად არის MAP. ANP-ის გარდა ამისა, ზემოთ ასევე 2008 წლიდან გვაქვს "ნატო საქართველოს კომისია" NGC, რაც არის ნატოსა და საქართველოს შორის ნებისმიერ დონეზე, ნებისმიერი არსებითი საკითხის, ნებისმიერ დროს, განხილვის მექანიზმი.

ყოველივე ეს გვაქვს ამდენი ხანია და ამის ზემოთ საქართველომ ასევე შეასრულა 2012 წლის ნატოს ჩიკაგოს სამიტის პირობა - მშვიდობიანად და არჩევნების გზით ვუზრუნველყოთ ხელისუფლების ცვლილება თუ ხალხის ნება ასეთი იქნება.

ასე რომ საქართველოს 2012 წლიდან მოყოლებული (ჩვენი მთავრობის მიერ დატოვებული) გასაწევრიანებლად მოსამზადებლად შინაარსობრივი თვალსაზრისით, ყველა ინსტრუმენტიც აქვს და ნატოს მოთხოვნაც უდაოდ შესრულებული აქვს და მხოლოდ დაგვრჩა ფორმალურად MAP-ის მიღება უშუალოდ გაწევრიანების წინ.

ყოველივე ამ ფონზე, როცა მთავრობა 6 წლის შემდეგ კმაყოფილია იმით, რაც ახლა გვაქვს და მეტის საჭიროებას და შესაძლებლობას არ აღიარებს, არის ივანიშვილის მთავრობის როგორც მინიმუმ არაეფექტიანობისა და (როგორც ჩანს) უმოტივაციობის დადასტურება. ცხადია ამათ პირობებში ასევე უშედეგოდ გაგრძელდება მომავალშიც, სანამ ამ ხალხს არ მოვიცილებთ მშვიდობიანი საარჩევნო პროცესის შედეგად, რაც მჯერა დაიწყება წელსვე, 28 ოქტომბერს საპრეზიდენტო არჩევნებში ჩვენი გამარჯვებით“ - წერს გიორგი ბარამიძე ფეისბუქის გვერდზე.