საქართველოს პრეზიდენტი გიორგი მარგველაშვილი უზენაესი სასამართლოს თავმჯდომარის კანდიდატურას აღარ წარადგენს. ამის შესახებ განცხადება დღეს პრეზიდენტის ადმინისტრაციის უფროსმა გიორგი აბაშიშვილმა გააკეთა.

საკითხს საპარლამენტო უმრავლესობის რიგებში აფასებენ. დავით მათიკაშვილი პრეზიდენტის გადაწყვეტილებას უპასუხისმგებლობას უწოდებს:

„პრეზიდენტი ფაქტობრივად, დარჩა მარტო. ეს პრეზიდენტის მხრიდან არის კიდევ ერთი უპასუხისმგებლო ნაბიჯი, როდესაც მან კონსტიტუციით მისთვის მინიჭებული უფლებამოსილების განხორციელებაზე თქვა უარი. ის არის მცდარი მოსაზრება, რომ „ქართული ოცნება“ არ აპირებდა კონსულტაციებში მონაწილეობას. ჩვენ ყოველთვის ვამბობდით, რომ დავფიქრდებით კონსულტაციებზე, უბრალოდ ჩვენ სკეპტიკურად ვუყურებდით კონსულტაციებს, რადგან პრეზიდენტის პრაქტიკა სასამართლოსთან მიმართებაში გვეუბნება იმას, რომ როგორც წესი, ის ან საკუთარ თანამშრომლებს წარადგენდა, ან მასთან დაახლოებულ პირებს. აქედან გამომდინარე იყო ჩვენი სკეპტიციზმი და არა უარი კონსულტაციებში მონაწილეობაზე. კიდევ ერთხელ ვამბობ, ეს არის უპასუხისმგებლო ნაბიჯი მარტო დარჩენილი პრეზიდენტის. ასევე ხაზგასასმელია ის, რომ მან ეს უპასუხისმგებლო ნაბიჯი გადადგა კონსტიტუციის დღეს, როდესაც საზოგადოებას ეცნო და ბეჭდური სახით წარედგინა კონსტიტუციის ახალი რედაქცია. დღევანდელ დღეს რაღაც სხვა პარალელური პროცესის გამართვა მისი მხრიდან არის არასწორი ნაბიჯი. ცხადია, ის იყო დაპატიჟებული დღევანდელ ღონისძიებაზე, მაგრამ იქ, სადაც მთელი ქართული საზოგადოება არის შეკრებილი, არ არჩია ყოფნა და გადაწყვიტა პარალელური პროცესის გამართვა, რაც არ არის მისაღები“, - განაცხადა მათიკაშვილმა.