თსუ-ში ანგელა მერკელს სტუდენტებთან შეხვედრისას შეკითხვა დაუსვეს იმასთან დაკავშირებით თუ რატომ არ უწოდებს აფხაზეთსა და „სამხრეთ ოსეთში“ განვითარებულ მოვლენებს ოკუპაციას. კითხვის ავტორი სტუდენტი კონსტანტინე შუბითიძე იყო.

"კითხვებზე პასუხის გაცემის დროს ორი დღეა უკვე იყენებთ შეფასებას - "უსამართლო მდგომარეობას" და არ იყენებთ სიტყვას "ოკუპაცია". ტერმინ "ოკუპაციასთან" რამე პრობლემა არის თუ რატომ არ იყენებთ? რატომ არ აფასებთ ცხინვალსა და აფხაზეთში განვითარებულ მოვლენებს როგორც "ოკუპაციას"?" - ამ სახით დასვა შეკითხვა კონსტანტინე შუბითიძემ.

„კითხვა ზუსტად ვერ გავიგე, ანუ მე ამას ოკუპაციად ვაფასებ თუ არა? ეს არის ოკუპირებული ტერიტორია. მე ვთქვი, რომ ეს არის ოკუპაცია. ეს არის დაკავებული ტერიტორია, 20 პროცენტი და ეს რჩება უდიდეს, უხეშ უსამართლობად.“ – განაცხადა ანგელა მერკელმა. მის ამ განცხადებას დარბაზში ტაშით შეხვდნენ.