ოკუპირებული აფხაზეთის დე ფაქტო ვიცე-პრეზიდენტს ვიტალი გაბნიას თავში ჭიქა ჩაარტყეს, რის გამოც ის თანამდებობიდან გადადგა. გადადგომის შესახებ მან დღეს გამართულ პრესკონფერენციაზე გააკეთა განცხადება.

„ბევრ თქვენგანს სმენია ინციდენტზე, ჩხუბზე ჩემი მონაწილეობით. საჭიროდ მივიჩნევ ამაზე ვისაუბრო. შელაპარაკების შემდეგ ერთ-ერთი მამაკაცი ადგა და ზურგიდან თავში ჭიქა ჩამარტყა. იძულებული ვარ თანამდებობიდან გადავდგე, რათა ჩემი ღირსება დავიცვა. ჩემი გადადგომა არ ეხება პოლიტიკურ რეალიებს“, - განაცხადა დე ფაქტო პრეზიდენტმა.

მისი თქმით, აფხაზეთში კანონი მოქალაქეების უფლებებს ვერ იცავს:

„პრობლემა იმაშია, რომ მე სუსტი აღმოვჩნდი, იმიტომ, რომ ადამიანი, რომელიც ფიქრობს, აზროვნებს და ცხოვრობს კანონების მიხედვით, აპრიორი სუსტი აღმოჩნდება ამ უკანონობის სისტემაში, სადაც მმართველობის კონტროლს ქუჩა ახორციელებს.

ზოგადად მთელი ჩვენი სამართალდამცავი სისტემა შერყეულია. სახელმწიფო კლავს, როდესაც არ სჯის დამნაშავეებს და სჯის უდანაშაულოებს. მე აუცილებლობად ვთვლი მოვიხსნა უფლებამოსილება და გადავდგე იმ მიზეზით, რომ მე არ შემიძლია დავიცვა ჩემი უფლებები და ღირსება, ამ მაღალ თანამდებობაზე ყოფნის დროსაც კი. მე მხოლოდ აფხაზურად მოქმედების შესაძლებლობა მაქვს, რისთვისაც მე მჭირდება უფლებამოსილების მოხსნა.“- განაცხადა ვიტალი გაბნიამ.

ვიტალი გაბნია დე ფაქტო ვიცე-პრეზიდენტის პოსტს 2014 წლიდან იკავებდა.