საქართველო რუსეთის ფედერაციის წინააღმდეგ - იუსტიციის სამინისტროს მიერ სტრასბურგში, არჩილ ტატუნაშვილის საქმეზე გაგზავნილ სარჩელს „ევროპული საქართველოს“ წევრი სერგო რატიანი ეხმაურება. მისი შეფასებით, იუსტიციის სამინისტროს მიერ გაგზავნილი სარჩელი დაგვიანებულია:

„დიდი ხანია მოვუწოდებთ ხელისუფლებას, მოამზადოს მსგავსი სარჩელი. აუცილებელია, გადადგმულიყო ეს ნაბიჯი. პროცესი ერთგვარად დაგვიანებულია, მაგრამ ახლა მნიშვნელოვანია, რომ ეს პროცესი დაწყებულია და პირველ რიგში, მნიშვნელოვანია იმისთვის, რომ გახდეს შემაფერხებელი ფაქტორი რუსეთის აგრესიული მოქმედებებისა. ერთი მხრივ, ეს არის საერთაშორისო საზოგადოების ზეწოლა რუსეთზე. იქ უნდა იცოდნენ, რომ რეაგირების გარეშე არც ერთი შემთხვევა არ დარჩება. ყველაფერი ეს არის ჯაჭვი პოლიტიკისა, რომელიც შემაფერხებელი ფაქტორი უნდა გახდეს“, – განაცხადა სერგო რატიანმა.