საქართველო რუსეთის ფედერაციის წინააღმდეგ - იუსტიციის სამინისტროს მიერ სტრასბურგში, არჩილ ტატუნაშვილის საქმეზე გაგზავნილ სარჩელს ადამიანის უფლებათა დაცვის და სამოქალაქო ინტეგრაციის კომიტეტის თავმჯდომარე სოფიო კილაძე გამოეხმაურა. კილაძე მიიჩნევს, რომ მნიშვნეოვანია ადამიანის უფლებათა ევროპულმა სასამართლომ დაამტკიცოს, ის ფაქტი, რომ ოკუპირებულ ტერიტორიებზე რუსეთი უხეშად და სისტემურად არღვევს ადამიანის უფლებებს:

„იუსტიციის სამინისტროს მიერ მომზადებული საქართველოს სახელმწიფოს სარჩელი რუსეთის ფედერაციის წინააღმდეგ აუცილებლად იქნება წარმატებული. ჩვენთვის მნიშვნელოვანია, რომ ადამიანის უფლებების ევროპულმა სასამართლომ, კიდევ ერთმა ძალიან ავტორიტეტულმა საერთაშორისო პლატფორმამ სამართლებრივად დაამტკიცოს, რომ ოკუპირებულ ტერიტორიებზე რუსეთი უხეშად და სისტემურად არღვევს ადამიანის უფლებებს. ღრმად ვარ დარწმუნებული, რომ ეს მასობრივი დარღვევა კეთდება იმისთვის, რომ ქართველებს სურვილი აღარ ჰქონდეთ ოკუპირებულ ტერიტორიებზე, საკუთარ მიწაზე დაბრუნების. რუსეთის მიერ ადამიანის უფლებების უხეში დარღვევის მთავარი სამიზნე ეთნიკურად ქართული მოსახლეობაა, რომელსაც უმძიმეს ვითარებაში უწევთ ცხოვრება.

ჩვენს ხელთ არის საერთაშორისო ბერკეტები. ადამიანის უფლებათა ევროპული სასამართლო, როგორც ყველაზე ქმედითი სამართლებრივი ინსტრუმენტი ადამიანის უფლებათა დასაცავად არის ყველაზე სწორი საშუალება იმისათვის, რომ კიდევ ერთხელ საერთაშორისო დონეზე, ახლა უკვე სამართლებრივი არგუმენტებით მოხდეს დამტკიცება იმისა, რომ სწორედ რუსეთი არის ოკუპანტი ქვეყანა, რომელიც უხეშად და მასობრივად არღვევს ადამიანის უფლებებს“, -განაცხადა სოფიო კილაძემ.