შავი ზღვის საერთაშორისო უნივერსიტეტისთვის ავტორიზაციის შეჩერების საკითხი - სასწავლო დაწესებულების ადმინისტრაციამ დღეს ადვოკატთან ერთად პრესკონფერენცია გამართა. პრესკონფერენციაზე მათ კერძო ინტერესებზე ისაუბრეს. ადვოკატის განცხადებით, ადმინისტრაცია გადაწყვეტილების გასაჩივრებას აპირებს:

„მიმაჩნია, რომ ეს არის კერძო ინტერესები, რომელიც გარკვეულად პოლიტიკასთანაც არის დაკავშირებული. არიან გარკვეული არაკეთილსინდისიერი პირები, რომლებიც ცდილობდნენ, ჩალის ფასად ჩაეგდოთ ხელში შავი ზღვის უნივერსიტეტი. ამ პირთა მიმოწერაც ცნობილია, გვარებიც ცნობილია, მაგრამ დღეს მათ სახელსა და გვარს არ დავასახელებ, თუმცა, მივაწოდეთ სათანადო ორგანოებს. გარკვეულწილად, ხელისუფლება არის საქმის კურსში, ყოველ შემთხვევაში, განათლების სამინისტრო ამასთან დაკავშირებით საქმის კურსში და ძალიან უცნაური იყო ქალბატონი სანიკიძის განცხადება, რომ, თითქოს, ინგლისურ კომპანიას სურდა ამ უნივერსიტეტის შესყიდვა და არ მოხდა მაშინ, როდესაც თვითონ განათლების სამინისტრო უშლიდა ხელს შესყიდვის პროცესს,“ - განაცხადა ადვოკატმა სოსო ბარათაშვილმა.