დედაქალაქის მერის კახა კალაძის განცხადებით, თბილისში, კახეთის გზატკეცილის სრული რეაბილიტაციის პროცესი უახლოეს მომავალში დაიწყება. კალაძის განცხადებით დღეისთვის აღნიშნულ მაგისტრალზე არ არის კარგი მდგომარეობა მაშინ, როცა საქართველოში ჩამოსულ ნებისმიერ ვიზიტორს, სწორედ ამ მონაკვეთის გავლა უწევს. მერის განცხადებით, ამ ეტაპზე სათადარიგო გზები კეთდება, მოგვიანებით კი დაიწყება რეაბილიტაციის მესამე ეტაპი:

„მინდა, შევეხო ინფრასტრუქტურულ პროექტებს, რომელიც ძალიან მნიშვნელოვანია იმ ადამიანებისთვის, ვინც მოძრაობს ქალაქში. თვალში მოსახვედრია უკვე ის სამუშაოები, რომელიც მთელი ქვეყნის მასშტაბით მიმდინარეობს. დღეს კიდევ ერთ ძალიან მნიშვნელოვან პროექტს ვიწყებთ, ეს არის კახეთის გზატკეცილის სათადარიგო გზა. მარჯვენა ზოლზე უკვე დაწყებულია სამუშაოები და უახლოეს მომავალში იქნება დასრულებული. ჩვენ სამ ეტაპად დავყავით ეს სამუშაოები, პირველი ეტაპი სექტემბრის ბოლოს დასრულდება და ახლა ვიწყებთ მარცხენა სათადარიგოს სრულ რეაბილიტაციას. როდესაც ესეც დასრულდება, მესამე ეტაპი იქნება სრული რეაბილიტაცია ცენტრალური მაგისტრალის. მარჯვენა, მარცხენა სათადარიგო გაკეთდა იმისთვის, რომ, როდესაც ცენტრალურის რეაბილიტაცია დაიწყება, გადაადგილება არ შეიზღუდოს. ცენტრალურ მაგისტრალზე ვაპირებთ, როგორც ასფალტის საფარის შეცვლას, ასევე შეიცვლება განათების ბოძები და მგონია, რომ საკმაოდ ლამაზი პროექტი იქნება,“ - განაცხადა კალაძემ.