„ტყუილების მთავარი შემფუთველი“... „უკადრებელსაც იკადრებს“ - ლაშა ნაცვლიშვილი „ქართული ოცნების“ პიარს ჩაიბარებს?

პოლიტიკა - 20:17, 21 Aug, 2018

2934

ჩაიბარებს თუ არა ლაშა ნაცვლიშვილი „ქართული ოცნების“ პიარს - ამ თემაზე ჯერჯერობით ხელიუფლების წარმომადგენლები არ საუბრობენ. შს მინისტრს გიორგი გახარიას მისი კანდიდატურა მოსწონს, თუმცა ამბობს, რომ ის ინფორმაციას არ ფლობს.

ლაშა ნაცვლიშვილისთვის „ქართული ოცნების“ პიარის ჩაბარებას უარყოფს რეგიონული განვითარებისა და ინფრასტრუქტურის მინისტრი, მაია ცქიტიშვილი.

„ბატონი ლაშა ნაცვლიშვილი არ არის ქართული ოცნების საზოგადოებასთან ურთიერთობის სამსახურის ხელმძღვანელი. მეტსაც გეტყვით, პარტია ქართულ ოცნებას არა აქვს ასეთი სამსახური, არ არსებობს მის შემადგენლობაში კომუნიკაციების სამსახური, შესაბამისად, მისი ხელმძღვანელ ბატონი ლაშა ვერ იქნება. როგორც ვიცი, ბატონი ლაშა კონსულტანტის ფუნქციას ასრულებს პარტიაში,“ - განაცხადა მაია ცქიტიშვილმა.

ოპოზიციის წარმომადგენლები აცხადებენ, რომ ლაშა ნაცვლიშვილი კორუმპირებული ხელისუფლების ერთ-ერთი წარმომადგენელი იყო, რომელიც შევარდნაძის ხელისუფლებიდან 2012 წელს „წარმატებით გადაპორტირდა ქართულ ოცნებაში“.

„ ჯერ იყო გენერალური პროკურორის მოადგილე და შემდეგ იყო მთელი ამ ქართული ოცნების ტყუილების მთავარი შემფუთველი. შესაბამისად, არაფერი არ არის გასაკვირი ამ ხელისუფლებისგან,“ - განაცხადა ზაალ უდუმაშვილმა.

ევროპული საქართველოს პოლიტიკური საბჭოს წევრი, ირაკლი კიკნაველიძე, აცხადებს, რომ ლაშა ნაცვლიშვილი არის ადამიანი, რომელიც „უკადრებელსაც იკადრებს“.

„ ეს არის ადამიანი, რომლის საქმიანობაც შეიძლება, მარტივად დავახასიათოთ, როგორც უკადრებლის კადრება. რასაც ვერ იკადრებს ვერავინ, ლაშა ნაცვლიშვილი აუცილებლად იკადრებს, თავის გუნდთან ერთად,“ - განაცხადა ირაკლი კიკნაველიძემ.

გავრცელებული ინფორმაციით, შალვა რამიშვილი ლაშა ნაცვლიშვილთან ერთად იმუშავებს ქართული ოცნების პიარსამსახურში. შალვა რამიშვილი ამბობს, რომ ნაცვლიშვილი მხოლოდ თანამშრომლობს მმართველი პარტიის პიარსამსახურთან.