არჩილ ტატუნაშვილი ცხინვალში სხვადასხვა მეთოდების გამოყენებით აწამეს, რამაც მისი გარდაცვალება გამოიწვია

არჩილ ტატუნაშვილი ცხინვალში სხვადასხვა მეთოდების გამოყენებით აწამეს, რამაც მისი გარდაცვალება გამოიწვია - „ემპათია“-ს ექსპერტთა ჯგუფი

პოლიტიკა - 19:56, 21 Aug, 2018

2237

ცენტრი „ემპათია“ - ს ექსპერტთა ჯგუფმა, 10 ექსპერტის მონაწილეობით 20/08/2018 - ში დაასრულა კომპლექსურ - კომისიური სასამართლო ექსპერტიზა არჩილ ტატუნაშვილის წამებისა და ძალადობრივი სიკვდილის ფაქტთან დაკავშირებით. დასკვნა მომზადებულია საერთაშორისო სტანდარტების „სტამბოლის პროტოკოლი“, „მინესოტას პროტოკოლი“, მსოფლიო ჯანდაცვის ორგანიზაციის სიკვდილის მიზეზების დადგენის საერთაშორისო გაიდლაინისა და დაავადებათა საერთაშორისო კლასიფიკაციის, მე - 10 - ე გადასინჯვის შესაბამისად.

აღნიშნული დასკვნით დადასტურებულია, რომ არჩილ ტატუნაშვილი ქ. ცხინვალში პატიმრობისას იქნა ნაწამები წამების სხვადასხვა მეთოდების გამოყენებით, რამაც გამოიწვია მისი გარდაცვალება.

დასკვნა წარმოადგენს მთავარ მტკიცებულებას სარჩელში ტატუნაშვილი რუსეთის ფედერაციის წინააღმდეგ, რომელიც ცენტრი „ემპათია“ -ს მიერ იქნა მომზადებული და 22 აგვისტოს ადამიანის უფლებათა ევროპულ სასამართლოში გაიგზავნება; ევროკონვენციის მე - 2 მუხლის (სიცოცხლის უფლება), მე - 3 მუხლის (წამების აკრძალვა), ასევე მე - 5 (თავისუფლების უფლება), მე - 8 (პირადი და ოჯახური ცხოვრების პატივისცემა) და მე - 13 მუხლების (ეფექტური ზომა) დარღვევისათვის.