სახელმწიფო უსაფრთხოების სამსახურის ხელმძღვანელის მოადგილის იოსებ გოგაშვილის გადადგომის ფაქტს, „ევროპული საქართველოს“ ერთ-ერთი ლიდერი გივი თარგამაძე ეხმაურება. თარგამაძის განცხადებით, გოგაშვილის წასვლა მაშინ გადაწყდა, როცა სახელმწიფო უსაფრთხოების სამსახურში გრიგოლ ლილუაშვილი მივიდა.

„ეს არ არის დიდი მოულოდნელობა, უკვე გარკვეული პერიოდია ამის მოლოდინი არსებობდა, არსებობდა ზოგადად იმ გადაადგილებიდან, რაც ბოლოს ხდება, როცა პრაქტიკულად უკვე ყველა საკვანძო ადგილი ბარდება უშუალოდ ქართუსთან დაკავშირებულ კადრებს ანუ ივანიშვილისთვის ოჯახურ ახლობელ კადრებს. ასეთი არის მაგალითად ლილუაშვილი, რომელიც ბოლო პერიოდში მივლინებული იქნა სუს-ში, მაშინვე იყო მოსალოდნელი გოგაშვილის წასვლა.

მე ვფიქრობ ეს პერიოდი დასჭირდა მასთან ვაჭრობას, რომ ის ინფორმაცია რომლის მატარებელიც ის არის იყოს შენახული და მშვიდად იყვნენ ივანიშვილის წარმომადგენლები“- აცხადებს "ევროპული საქართველოს" წევრი გივი თარგამაძე.