უზენაესი სასამართლოს თავმჯდომარის კანდიდატურის შერჩევის პროცესი - იუსტიციის უმაღლესი საბჭოს წევრი ნაზი ჯანეზაშვილი პრეზიდენტს აკრიტიკებს იმის გამო, რომ მისი განცხადებით, კონსულტაციებში არ მოხდა იუსტიციის უმაღლესი საბჭოს წევრების ჩართვა და მათ აღნიშნულთან მიმართებით არავითარი შეთავაზება არ მიუღიათ.

ჯანეზაშვილის აღნიშნულ განცხადებას, პრეზიდენტის მრჩეველი კახა კოჟორიძე „ნიუპოსტთან“ საუბრისას პასუხობს. კოჟორიძის თქმით, მას პირადად ჰქონდა საბჭოს მდივანთან საუბარი საბჭოს წევრებისა პროცესში ჩართულობასთან მიმართებით, რაზეც გიორგი მიქაუტაძემ განაცხადა, რომ ვერ მოხერხდებოდა, რადგან საბჭოს წევრები შვებულებებში იმყოფებოდნენ:

„სამწუხაროა, როგორც ჩანს ქალბატონ ნაზის არ მიეწოდა ეს ინფორმაცია, რომ პრეზიდენტის ადმინისტრაციას, პირადად მე, მქონდა კონსულტაცია იუსტიციის უმაღლესი საბჭოს მდივანთან ბატონ გიორგი მიქაუტაძესთან, მე ვაცნობე ის, რაც პრეზიდენტმა თავიდანვე დააფიქსირა, რომ გვინდოდა ამ პროცესში საზოგადოების, პროფესიული წრეების მაქსიმალური რაოდენობა შესულიყო, მე შევთავაზე, რომ მათთვის სასურველ დროს ჩვენ შეგვეძლო მივსულიყავით და იუსტიციის საბჭოს ყველა წევრს და უზენაესი სასამართლოს ყველა მოსამართლეს შევხვედროდით ამ საკითხებთან დაკავშირებით. ბატონმა გიორგიმ თქვა, რომ იუსტიციის უმაღლესი საბჭოს წევრები იყვნენ შვებულებაში, თუმცა ის მაინც შეეხმიანებოდა მათ და გვეტყოდა მოხერხდებოდა თუ არა შეხვედრა. ისევ გვქონდა ჩვენ კომუნიკაცია და მან განაცხადა, რომ სამწუხაროდ იუსტიციის უმაღლესი საბჭოს წევრები იყვნენ შვებულებაში და შესაბამისად, ეს შეხვედრა ვერ ხერხდებოდა“, - განაცხადა კახა კოჟორიძემ.